Флик “Барса”ни енгилмас жамоага айлантирди

Европа Чемпионлар лигасининг чорак финал биринчи учрашувида “Барселона” футболчилари ўз мухлислари кўз ўнгида Дортмунднинг “Боруссия” клубини янчиб ташлади.

Рафинья ва Ламин Ямалнинг биттадан голи ва Роберт Левандовскининг дубли ҳисоб 4:0 кўринишига келишини таъминлади.

Шу тариқа, германиялик тажрибали мутахассис Ханс-Дитер Флик бошқараётган “Барселона”нинг мағлубиятсиз серияси 23 та учрашувни ташкил қилмоқда.

Каталонияликлар охирги бор 2024 йилнинг 21 декабрида “Атлетико” жамоасидан 1:2 ҳисобида мағлубиятга учраган эди. Шундан бери Флик шогирдлари  19 та баҳсни ўз фойдасига ҳал қилди ва тўрт маротаба дурангга розилик берди.

Энди “Барселона” 12 апрель куни Испания чемпионати доирасида “Леганес” меҳмони бўлади ва уч кундан кейин сафар “Боруссия”га қарши жавоб ўйинида майдонга тушади.