ФИФА Ла Лига клуби ва Осиёдаги терма жамоадан 7 ўйинчини футболдан четлатди

Халқаро футбол уюшмалари федерацияси - ФИФА ташкилоти Малайзия терма жамоасининг етти нафар футболчисини бир йил муддатга футболдан четлатди.

Бу ўйинчиларга ҳужжатларни сохталаштириш айби қўйилган.

Жазоланган рўйхатида Испания чемпионати юқори дивизионида “Алавес” клуби шарафини ҳимоя қилган Факундо Гарсеснинг борлиги шов-шувларга сабаб юўлди.

Бундан ташқари, санкцияга тушган Габриэль Фелипе, Родриго Ольгадо, Иманоль Мачука, Жоау Фигейреду, Йон Ирасабаль, Эктор Алехандро Хевель Серрано Малайзияга дахли бўлмаган ва келиб чиқиши Аргентина, Бразилия, Испания, Нидерландияга боғлиқ футболчилар экани аниқланган.

ФИФАга кўра, Малайзия футбол ассоциацияси бу ўйинчиларни халқаро миқёсдаги мусобақаларда қатнашиш учун қайдномага киритишда сохта ҳужжатларни тақдим этган. Бу футболчиларнинг бари Осиё кубоги саралаш босқичида Вьетнам (4:0) билан бўлган учрашув қайдномасига киритилган ва ўйинда иштирок этган.

ФИФА  санкция қўллаган бу футболчилар 12  ой давомида футболда ҳар қандай турдаги фаолият кўрсатиши таъқиқланди. Уларнинг ҳар бири 2,1 минг евро миқдорида жарима тўлайди. Шунингдек, Малайзия футбол ассоциацияси  375 минг евро жаримага тортилди.