Рўзиқул Бердиев: "Абдувоҳидни сўксангиз ҳам, уришсангиз ҳам фойдаси йўқ, унга таъсир қилмайди" (Тўлиқ матбуот анжумани)

Эртага Элит Чемпионлар лигаси 2-туридан ўрин олган "Насаф" - "Ал-Ҳилол" учрашуви бўлиб ўтади. Бугун ўйиндан олдин иккала жамоа бош мураббийлари ва футболчилари иштирокида матбуот анжумани бўлиб ўтди.

Дастлаб, "аждарлар" устози Рўзиқул Бердиев бўлажак ўйин ҳақида ўз фикрларини билдирди. Кейин эса журналистларнинг саволларига жавоб берди.

"Авваламбор, ассалому алайкум, хайрли кеч. "Ал-Ҳилол" билан бўладиган ўйин барча учун қизиқ. Бу ўйин ҳақида кўп гапириляпти, ҳамма баҳсни кутяпти. Ўйлайманки, эртага стадионимизда ажойиб муҳит бўлади. Кучли жамоа билан муносиб ўйнашга ва мухлисларимизни хурсанд қилишга ҳаракат қиламиз. Бунинг учун бор маҳоратимизни, бор кучимизни ишга соламиз. Иштиёқ, хоҳиш бўлган жойда натижа ҳам яхши бўлади. 

Ҳар бир ўйиндан олдин рақибни ўрганиб чиқамиз. "Ал-Ҳилол"га таъриф беришим шарт эмас. Ўз сиёсати, трансферлари билан бутун дунёга танилиб боряпти. Охирги ўйинларини кўриб, бу ҳақда йигитларга керакли кўрсатмаларни етказдик. 

Рақибимиз индивидуал жуда ҳам кучли футболчиларга эга. Бироқ охирги ўйинлари кўрсатдики, уларда ҳам муамммолар топилади.

 "Ал-Ҳилол"нинг бурчак зарбалари, стандартлардан фойдаланишини яхши биламиз. Эртага "Насаф" бунга қандай чоралар кўради?

Стандартлар футболда жуда ҳам муҳим. Бироқ стандартларидан кўра, тезкор қарши ҳужумлари жуда ҳам хавфли. "Ал-Аҳли" билан ўйинида уларни таҳлил қилиб чиқдик. Ўша ўйинда ҳам 3 та голнинг барчасини қарши ҳужумдан киритди.

Рақиб сафида Ал-Довсари, Дарвин Нуньез каби футболчилар келмаган. "Насаф"да ҳам жароҳатланганлар борми?

"Ал-Ҳилол"нинг таркиби қандай кенглигини биласиз. Уларнинг ўрнини тўлдирадиган, билинтирмайдиган ўйинчилар жуда кўп. Нафақат легионерлар, балки Саудия терма жамоаси аъзолари бор. Биз бу ҳақда ўйламай, ўз ўйинимизни қилишимиз керак.

Бизда ҳам йўқотишлар бор. Барчасини айтиб ўтмоқчи эмасман. Лекин бу ҳақда ҳам ўйлаётганим йўқ. 

"Насаф" эртага қандай тактикада ўйнайди?

Эртага тактика битта бўлиши керак, иштиёқ юқори бўлиши керак. Ўйинимизда тартиб бўлиши керак. Менимча энг яхши тактикамиз шу бўлади.

Абдувоҳид Неъматовнинг руҳий ҳолати ҳақида гапириб ўтсангиз. У "Ал-Аҳли"га қарши ўйинда кутилмаган хатоларга йўл қўйган эди. 

Абдувоҳидни сўксангиз ҳам, уришсангиз ҳам фойдаси йўқ, унга таъсир қилмайди. У бир хилда. Абдувоҳид молодец, руҳан жуда кучли йигит. Менимча ҳар бир ўйинга тайёргарлигини ўзи билади. Унга кийиниш хонасида ҳеч қандай танбеҳ бермадик. Жамоа йўтқазганини тан олдик. 

Буёғига жамоа ҳам, Абдувоҳид ҳам бу хатоларни қилмаслиги керак. Рақиблар шу даражада кучлику, битта хатога голга олиб келади.