Финал йўлланмаси ПСЖга 1,3 миллиард еврога тушди

Франция гранди ўз тарихида илк маротаба Европа Чемпионлар лигасининг финалида ўйнайдиган бўлди.

Дунё бўйлаб 3 миллион обуначига эга бўлган MisterChip статистика твиттерининг ҳисоб-китобларига кўра, Нассер Ал-Хелаифий ПСЖни харид қилган 2011 йилдан буён уни суперклубга айланитириб, Чемпионлар лигасида муносиб иштирок этадиган жамоани шакллантиришга 1,3 миллиард евро сарфлагани аниқланди.

Қарийб 10 йил давомида клуб футболчиларни сотиш орқали 443 миллион евро ишлаб топган. Бу жараёнда трансферлардаги камомад 860 миллион еврони ташкил қилмоқда.

ПСЖ тарихида энг қиммат футболчилар қаторидан Неймар (222 млн евро), Килиан Мбаппе (145 млн), Эдинсон Кавани (64,5 млн), Анхель Ди Мария (63 млн), Мауро Икарди (50 млн) ва Давид Луиз (49,5 млн) ўрин олган.

Шунингдек, парижликлар илк бор Чемпионлар лигасига чиқиши учун 110 та учрашув керак бўлди. Бу ҳам турнирнинг ўзига яраша рекорд ҳисобланади.

Ал-Хелаифий даврида ПСж етти маротабадан “Лига 1” чемпиони, Франция лигаси кубоги ва мамлакат супер кубоги соҳиби, саккиз марта Франция кубоги соҳиби бўлди.