Фелиш трансфери расман эълон қилинмаган бўлса-да, футболчи жамоа билан машғулот ўтказмоқда

Ҳали Жоау Фелишнинг "Челси"дан Саудия Арабистонининг "Ан-Наср" клубига ўтгани расман эълон қилинмади. Аммо 25 ёшли португалиялик ҳужумчи жамоанинг Австриядаги йиғинларида машғулот ўтказаётгани акс этган видео ижтимоий тармоқларда тарқалди.

"Ан-Наср"да Фелиш ўзининг юртдоши, футбол юлдузи Криштиану Роналду билан бир жамоада ҳаракат қилмоқда. Шунингдек, жамоани яқинда португалиялик мураббий Жорже Жезуш бошқарувга олди.

Эслатиб ўтамиз, Жоау Фелиш 2024/2025 йилги мавсумнинг иккинчи қисмида "Милан" сафида ижара асосида тўп сурган. Ўтган мавсумда Саудия клуби ички чемпионатни учинчи ўринда якунлаган ва янги мавсумда юқори натижа қайд этишни мақсад қилган.