Файзуллаев узоқ танаффус олишга мажбур бўлди
Ўзбекистон миллий терма жамоаси юлдузлари – Элдор Шомуродов ва Аббосбек Файзуллаев ўйнаётган “Истанбул Башакшеҳир” бугун УЕФА Конференциялар лигасининг плей-офф босқичи финалида жавоб ўйинини ўтказади.
Аввалги икки босқичда Болгариянинг “Черно Море” ва Норвегиянинг “Викинг” жамоасини мусобақадан чиқариб юборган истанбулликлар плей-оффнинг охирги босқичида Руминиянинг “Университетя Крайова” клубига рўбарў келди.
Истанбулдаги дастлабки учрашувда Чағдаш Атан шогирдлари кутилмаганда рақибга 1:2 ҳисобида имкониятни бой бериб қўйди. Энди умумий гуруҳга қайси жамоа чиқиши “Университетя Крайова” жамоаси мезбонлик қиладиган жавоб учрашувида аниқланади.
Чағдаш Атан ўйиндан олдин ўз-фикр мулоҳазаларини билдириб, Аббосбек Файзуллаев ҳақида алоҳида тўхталди.
Ўйин ҳақида
Биринчи учрашувдаги мағлубиятдан афсусдамиз. Биз раҳбарият ва мухлислар ишончини оқлай олмадик. Илк баҳсда ўтказиб юборган икки голимиз бўш ўйинимиз оқибатидир. Биз тўпни назорат қилган бўлсак-да, бундан самара чиқара олмадик. Жавоб учрашуви мураккаб бўлади ва биз ғалаба қозониб, кейинги босқичга ўтмоқчимиз.
Файзуллаев ҳақида
Аббосбек Файзуллаев узоқ муддат танаффус қилишга мажбур бўлди. Унинг трансфери ва биринчи расмий учрашуви орасида анча вақт ўтиб кетди.
Биз Аббоснинг юқори спорт формасига чиқишини кутяпмиз. Тез орада футболчининг жисмоний тайёргарлиги юз фоизга етади. Секин-аста ўйин амалиётига эга бўлиб, спорт формасини тўлиқ тиклаб олади.
Мен футболчиларимга юз фоиз ишонаман. Уларнинг ҳаммаси ўйинга тайёр.
Муҳит ҳақида
Биз Туркияда мухлислар босими остида ўйнашга кўникиб қолганмиз. “Викинг” билан охирги учрашувимизда ҳам муҳит шунақа эди. Туркиянинг “Галатасарой”, “Фенербаҳче”, “Бешиктош” ва “Трабзонспор” клублари уй учрашувлари доим тўлиб-тошган мухлислар билан ўтади.
Биз финалларда доим яхши ўйнайдиган жамоалар қаторига кирамиз. Олдиндаги тўқнашув ҳам биз учун финалга тенг ўйин бўлиши шубҳасиз.
Еврокубоклар ҳақида
Конференциялар лигасининг умумий гуруҳ босқичига чиқиш биз учун ҳам, руминияликлар учун ҳам жуда муҳим аҳамиятга эга. Жамоамиз Европада ўйнашга кўникиб қолган. Қисқа истиқболдаги режаларимизга гуруҳ баҳсларида ўйнаш вазифаси киритилган. Бунинг учун жавоб ўйинида муваффақият қозонишимиз шарт.
Бу ерга турк халқига фахр-ифтихор бахшийда этгани келдик. Масаланинг молиявий томонлари бизни безовта қилмайди. Лиганинг асосий турнирига чиқишимизга бир қадам қолди. Биз ана шу қадамни ташлаймиз.
Таъкидлаш жоизки, бўлажак учрашувда Элдор Шомуродов бошланғич таркибда майдонга тушиши кутилмоқда. Аббосбек Файзуллаев эса, захирадан ўйинга қўшилиб жамоага ёрдам беради.
Турк футболи манбалари Руминиядаги учрашувни қуйидаги таркиб бошлашини тахмин қилмоқда:
“Башакшеҳир”:
Дарвозабон:
Волкан Бабажан;
Ҳимоячилар:
Онур Булут, Уссейну Ба, Жером Опоку, Кристофер Опери;
Ярим ҳимоячилар:
Берат Ўздемир, Дениз Тюруч, Мигель Креспо, Оливье Кемен;
Ҳужумчилар:
Элдор Шомуродов, Нуно да Кошта.
“Университетя Крайова” ва “Истанбул Башакшеҳир” ўртасидаги жавоб ўйини 28 август куни Тошкент вақти билан соат 22:30 да бошланади.
Фикрлар