
"Ал-Халдия" бош мураббийи: "Андижон" бизга албатта бош оғриғи бўлишини биламан"
“Андижон” - “Ал-Халдия” учрашуви олдидан “Бобур арена”да матбуот анжумани бўлиб ўтди. Унинг иккинчи қисмида меҳмонлар бош мураббийи Али Ашур ва жамоанинг сенегаллик легионери Доменик Менди қатнашдилар.
Али Ашур: “Дастлаб Андижон аҳлига миннатдорчилигимни билдираман. Аэропортдан кутиб олишдан бошлаб бизни жойлаштириш, умуман, стадиондаги шароитлар барчаси аъло даражада. Бизни яхши кутиб олишди. Бундан жуда ҳам хурсандман. Хусусан, Ўзбекистонга ва Андижондек ажойиб шаҳарга келганимздан хурсандмиз. Бемалол айта оламанки, улар Баҳрайнга борганида бизни қандай кутиб олишган бўлса, биз уларн ундан ортиғи билан кутиб олишга ҳаракат қиламиз. Эртага жуда қийин рақибга қарши ўйнаймиз. Бизни жиддий учрашув кутиб турибди, деб айта оламан. Яхши мураббий ва яхши футболчилар бор. Бу жамоа иккита учрашувдан бери ҳали гол ўтказмасдан келмоқда. Майдонда футболчилар ажойиб ўйин кўрсатишди. Лекин биз ҳам Баҳрайндаги иккита ўйиндан кейин яхши натижа кўрсатдик. Эртага ҳам мана шундай яхши натижа кўрсатишга ҳаракат қиламиз. Футболчиларимиз ҳам учрашувни интиқлик билан кутишмоқда ва эртага майдонга тушишни исташмоқда. Эртага боримизни бериб, энг яхши ўйинимизни кўрсатиб, ижобий натижа билан қайтишни режа қиляпмиз.
Доминик Менди: “Бу ерга келганимиздан жуда ҳам хурсандмиз. Ҳозир мураббийимиз барчасини айтиб ўтди. Менимча, қўшимча қилишга ҳожат йўқ. Эртага ўйинда боримизни бериб яхши натижа учун курашамиз. Мақсадимиз, режамиз битта. Мураббийимиз эртагалик учрашувга қандай тайёргарлик кўришимизни белгилаб беради. Шу тайёргарликдан келиб чиқиб яхши натижа кўрсатиб кетишимиз керак.
- Андижонга хуш келибсиз. “Ал-Халдия”ни учрашувларини кўрганимизда сафарда ҳам ҳужумкор ўйин кўрсатиб яхши натижаларга эришган. Эртагалик баҳсда жамоангиз ҳужумкор ўйин кўрсатадими ёки ҳимояга асосланган ўйин кўрсатадими?
Али Ашур: - Савол учун раҳмат. Футболни яхши кузатар экансиз. Билсангиз агар, “Ал-Халдия” Баҳрайннинг кучли клубларидан бири. Ўз тарихига эга. Ҳар доим ҳужумкор футбол намойиш этиб келганмиз. Мен ҳам мураббий сифатида айнан ҳужумкор футболни яхши кўраман. Меҳмон ёки уйда ўйнаганимизда ҳам шунга ҳаракат қиламиз. Лекин уй ва меҳмон ўртасидаги ўйинларда фарқ бўлади. Чунки биз кўпроқ тўпга эгалик қилишни истаймиз. Тўп билан яхши ўйнашни хоҳлаймиз. Агрессивроқ бўлишга ҳаракат қиламиз. Бироқ ҳар доим ҳам бу нарса ўхшамаслиги мумкин. Чунки рақибга ҳам боғлиқ. Мисол учун, эртага “Андижон”га қарши учрашувда балки бошқачароқ ўйин кўрсатармиз. Боиси, “Андижон” ҳам ҳужумкорроқ ўйин кўрсатади. Уларнинг охирги иккита учрашувини кўрдик. “Аркадаг” ва “Ал-Аҳли”га қарши баҳсларда голли вазиятлар яратишган. Эртага майдонда кўрамиз. Мураббий сифатида мен доим ҳужумкор футбол тарафдори бўлганман.
- “Андижон” жамоасини ўрганиб чиққанингизни таъкидлаяпсиз. Бу клуб илк бор ОЧЛда иштирок этяпти. Қандай кузатдингиз? Балки “айғоқчи” юбордингизми ёки видеолар орқали кўрдингизми?
Али Ашур: - Асосан видеолар орқали. Осиё Чемпионлар лигасидаги иккита ўйинини кузатдик. Қолаверса, миллий чемпионатдаги учрашувларини ҳам кузатиб бормоқдамиз. Жамоани нечта гол уриб, нечта гол ўтказганини ҳам биламиз. “Андижон”даги футболчиларни бемалол айтишим мумкин. Масалан, қирғизистонлик дарвозабон, 8-, 3-, 26-, 18-рақамдаги жамоа сардори, қолаверса, 22-рақамдаги футболчиси бизда яхши таассурот қолдирди. Тезкор, ҳар доим рақиб жарима майдончаси ичида юради. “Андижон”ни жуда яхши таҳлил қилдик. Ҳар тарафлама ўрганиб чиқдик. Қайси чизиқда қайси ўйинчиси қанақа ўйнашларигача биламиз. Ким бош билан яхши ўйнайди, ким ҳимояда яхшироқ тўп суради, айтяпманки, эртага бизни жуда оғир учрашув кутиб турибди. Миллий чемпионат билан халқаро ўйинни фарқи бўлади. “Андижон” эртага бизга албатта бош оғриғи бўлишини биламан.
- Куз ойларида Ўзбекистонда ҳаво бироз ўзгаради. Баҳрайн билан юртимиз об-ҳавосида фарқи бўлиши мумкин. Халқаро майдонларда араб ўйинчиларини қийналган ҳолатларини кўрганмиз. Об-ҳаво эртагалик ўйинга қанчалик таъсир қилиши мумкин?
Доминик Менди: - Бу нарсаларни биламиз, хабаримиз бор. Мураббийимиз ҳам айтиб ўтган. Бунга руҳий жиҳатдан ва барча шундай нарсаларни эътиборга олиб тайёргарлик кўрганмиз. Баҳрайндаги об-ҳаво билан унчалик катта фарқ қилмайди. 2017 йили Ўзбекистонда ўйнаганман. Ўшанда январь ойида жуда совуқ эди. Ҳозиргиси билан солиштирганда анча яхши.
- ОЧЛ 2 нинг ўтган турида “Ал-Халдия”нинг “Аркадаг” билан учрашувини кузатганимизда сизни анча хиссиётларга берилганингизга гувоҳ бўлдик. Эртага “Бобур арена”да қайноқ муҳит юзага келади. Шуни ҳисобга олганда ўзингизни хиссиётли вазиятларга қанчалик тайёрлаяпсиз?
Али Ашур: - Хиссиётларга берилишим - бу мураббийликдаги одатим. Ҳаммада бўлади. Мени одатим шунақа. Менимча, кўп мураббийларда шундай бўлади. Сабаби, ўйин пайтида футболчиларга кўрсатмалар берамиз, асабийлашамиз. Лекин одатда, футболчилар билан суҳбатлашганимда уларга позитивлик улашишга ҳаракат қиламан. Буларни барчасини футболни бир қисми деб айта оламан. Бизга бундай ҳолат бегона эмас. ОЧЛда иккинчи йил иштирок этаётган бўлсак-да, катта муҳитларда тўп сурганмиз. 40 минг мухлис қаршисида ўйнадик, Эронда 70 минг ишқибоз келди. Шу боис биз тайёрмиз. Эртанги ўйинга келсак, биз ҳам жуда яхши муҳитни кутяпмиз. “Андижон” мухлисларини ўз жамоасини қандай қўллаб-қувватлашларини биламиз. Бунга тайрёмиз. Умид қиламанки, улар бизнинг ҳам, “Андижон”нинг ҳам ўйинидан завқ олишади.
Фикрлар