Fayzullaev o‘ziga keldi!

8 aprel, 2024, 15:11
Zohir Toshxo’jayev
1
Futbol

Rossiya Premer-ligasining 23-turida TsSKA o‘z maydonida “Fakel”ni 4:1 hisobida mag‘lubiyatga uchratib, 36 ochko bilan musobaqa jadvalida to‘rtinchi o‘ringa ko‘tarilib oldi.

Endi “armiyachilar”ni uchinchi pog‘onani egallab turgan “Dinamo” bilan orasini atigi ikki ochko ajratib turibdi.

Vladimir Fedotov shogirdlari qolgan uchrashuvlarda g‘alaba qozonishni davom ettiradigan bo‘lsa, yanada yuqoriroq ko‘tarilish imkoniyati bor. Chunki dastlabki ikki o‘rinni egallab turgan “Zenit” va “Krasnodar” bilan ochkolar farqi unchalik katta emas va bu jamoalar ham barqaror o‘yin ko‘rsata olayotgani yo‘q.

E’tiborli jihati – “Fakel” bilan o‘yinda Abbosbek Fayzullaev to‘p kiritib, o‘z hisobiga mavsumdagi uchinchi golini yozdirib qo‘ydi. Osiyo kubogidan keyin TsSKAda zaxiraga o‘tirib qolgan legionerimiz yana boshlang‘ich tarkibdagi joyini qaytarib oldi.

Rossiya futboli ekpertlari o‘zbek legionerining o‘yinidagi ijobiy o‘zgarishlarga o‘z bahosini berdi.

Sports.uz portali ekspertlarning 20 yoshli hujumkor futbolchimiz haqidagi fikr-mulohazalarini o‘zbekistonlik futbol ishqibozlari e’tiboriga havola qiladi.

Valeriy Masalitin, TsSKAning sobiq futbolchisi:

Birinchi bo‘limdagi shiddatli o‘yin maydonda kim xo‘jayin ekanini ko‘rsatib qo‘ydi. Bu TsSKAning joriy yildagi eng mazmunli o‘yini bo‘ldi. Abbosbek Fayzullaev o‘yini haqida nima deyish mumkin? Unga biroz og‘ir.

Osiyo kubogidan qaytdi, tabiiyki, unga ham jismoniy ham ruhiy jihatdan to‘liq tiklanib olish uchun vaqt kerak. Abbos hali yosh yigit, bunaqa yuklamalarni katta o‘yinchilarning hammasi ham ko‘tara olmaydi. Biroz tanaffus qildi va endi sekin-asta o‘ziga kelyapti, biro hali o‘zining optimal darajasiga chiqqani yo‘q.

Bu galigi uchrashuvda kutilmagan harakatlari, aniq paslari, goli bilan ajralib turdi, ammo baribir unga yana vaqt kerak.

Aleksandr Grishin, TsSKAning sobiq futbolchisi:

Men Fayzullaevga Osiyo kubogidan keyin biroz dam berishganini tushunib etdim. U xalqaro miqyosda ko‘p o‘yin o‘tkazdi va TsSKAning mavsum oldi tayyorgarligida to‘liq ishtirok etmadi. Shuning uchun ham birdan o‘ynab ketish juda qiyin va murabbiylar Fayzullaevga biroz hordiq chiqarish uchun imkoniyat yaratib berdi. Balki funktsional holati shuni taqozo etgandir.

Hozir ikkita oxirgi uchrashuvda yaxshi o‘ynadi va bu bizga umid bag‘ishlaydi. Abbosbek kreativ futbolchi, TsSKA qanotdan uyushtiriladigan hujumlarni aynan Fayzullaev yordamida tashkil qilmoqda. Bu gal uning o‘zi ham chiroyli gol urishga erishdi. Formasini tiklayapti. O‘ylashimcha, oldindagi uchrashuvlarda ham boshlang‘ich tarkibda maydonga tushadi.

TsSKA futbolchilari Premer-ligadagi navbatdagi uchrashuvini huddi o‘zlari singari 36 ochko jamg‘argan “Lokomotiv”ga qarshi o‘tkazadi. 13 aprelga belgilangan o‘yinga “temiryo‘lchilar” mezbonlik qiladi.