Evropa va Osiyo klublarining jiddiy takliflarini nega qabul qilmadi? "Buxoro"ni tanlashiga nima turtki berdi?

“Buxoro” yangi mavsum uchun tarkibini kuchaytirishda davom etyapti. Kuni kecha tajribali o‘yinchilardan biri Dilshod Jo‘raev bilan kelishuvga erishishdi.

1991 yilda tavallud topgan futbolchi o‘tgan yilgi chempionatning birinchi davrasini “Bunyodkor”da va ikkinchi davrasini “Qizilqum” safida o‘tkazdi.

Tayanch yarim himoyasida o‘ynaydigan bu futbolchining “Buxoro” o‘yinini kuchaytirishi kutilmoqda.

Yana shuni ham qo‘shimcha qilish joizki, Dilshodbek yangi mavsumni xorijda o‘tkazishi ham mumkin edi. Biroq yakunda ketmadi va yana shu erda to‘p surishda davom etadigan bo‘ldi. Qolganini o‘zidan eshitamiz.

“Buxoro”ga o‘tishi haqida

- “Buxoro” klubiga o‘tishimda bosh murabbiy katta rol o‘ynadi. Avvalambor, Hakim Qayumovich yaxshi inson va yaxshi murabbiy. Asosiy omillardan biri shu bo‘ldi. Xudo xohlasa, 2023 yilda “Buxoro” sharafini munosib himoya qilib, qo‘limizdan kelganicha klub mavqeini yuqoriga ko‘tarishga harakat qilamiz.

“Qizilqum”dan nega ketdi?

- “Qizilqum”dan ketishimga keladigan bo‘lsak, aslida u erda ham qolishim mumkin edi. Chunki jamoada yana to‘p surishimni xohlashdi. Ammo “Qizilqum”da moliyaviy taraflama biroz qisqarish yuz berdi. Balki moliyaviy jihatdan o‘zgarish bo‘lmaganida yana u erda qolgan bo‘lardim, deb o‘ylayman.

Navoiy jamoasidagi yarim yillik faoliyati to‘g‘risida

- Navoiy jamoasidagi yarim mavsum men uchun yomon o‘tmadi. “Qizilqum”da yaxshi jamoa tuzilgandi. 5-o‘rinni egalladik va eshitishimcha, jamoa taxminan 15-20 yildan beri bu pog‘onanini band etmagan ekan. Kuchli to‘rttalikka kirish uchun “Qizilqum”ga bir pog‘ona etmadi. Aks holda Osiyo Chempionlar ligasida qatnashish imkoniyati bo‘lardi. Achinarli tarafi shu bo‘ldi.

Boshqa chaqiruvlar xususida

- Men uchun yana boshqa takliflar ham bor edi. Ayniqsa, xizmatimga xorij jamoalaridan qiziqishlar bo‘ldi. Armaniston klubidan taklif tushdi. Keyin Janubiy Koreya birinchi divizion qatnashchisidan ham chaqiruv bo‘ldi. Moliyaviy tomonlama o‘zimizdagidan u qadar katta rol o‘ynamagani uchun O‘zbekistonda oilamni, ota-onamni yonida qolishni xohladim. Ota-ona ham g‘animat. Lekin 100 foiz takliflar edi. Biroq yuqoridagi sabablarga ko‘ra bu jarayon biroz cho‘zildi.

Yangi klubidagi ilk taassurotlari

- “Buxoro” jamoasidagi taassurotlarim juda iliq. Yigitlar ochiqko‘ngil ekan. Klubda oldin birga o‘ynagan akalarim va ukalarim ham bor. Kelishimdan avval ular bilan muloqot qildik. Jamoaga kelsam xursand bo‘lishlarini ta’kidladilar. 2023 yilda “Buxoro”ni bejizga Superligaga qaytmaganini isbotlab, iloji boricha yuqori o‘rinlar uchun kurashib, muxlislarni xursand qilishga harakat qilamiz.

Shuhratbek Jo‘raev.