“Челси” ўйинчилари эвакуация қилинди

Англия Премьер-лигаси иштирокчиси “Челси”нинг асосий таркиби ўйинчилари ва клуб ходимлар машғулотлар базасидан фавқулодда ҳолат туфайли эвакуация қилинди.

The Sun нашрининг ёзишича, машғулотлар базасида кимёвий восита – хлорнинг  сизиб чиқиши ва ёйилиш хавфи вужудга келганидан кейин эвакуация ҳақида буйруқ берилган.

Маълумотларга қараганда, Кобхэмдаги машғулотлар базаси биносидаги сув ҳавзасининг сигнализациялари ишлаб кетган. Воқеа жойига Суррей графлиги ўт ўчирувчи ва қутқарув хизматлари вакиллари етиб келган.

Қутқарувчилар ҳудудни текширувдан ўтказиб, ҳеч қандай хавф-хатар йўқлигини тасдиқлаганидан кейин ҳамма ўз ишини давом эттириш учун бинога қайтарилган.