Беллингем бошқа клубга ўтяпти

“Реал” юлдузи Жуд Беллингемнинг укаси Жоб ёзда жамоасини ўзгартиришга қарор қилди. Мавсумни “Сандерленд”да якунлаган иқтидорли футболчи акасининг йўлидан борадиган бўляпти.

Sky Sport журналисти Флориан Плеттенбергнинг ёзишича, Жоб фаолиятини “Боруссия Дортмунд”да давом эттиришга розилик берди. Бундан бир неча йил аввал Жуд ҳам Англиядан Дортмундга ўтган ва кейинчалик “Реал” таркибига қўшилган эди.

Жоб Беллингем “Айнтрахт” таклифига кўра, Германияга келиб, Бундеслига жамоалари шароити билан танишган эди. 19 ёшли футболчи франкфуртликларга бошқа жамоага ўтишини ҳам айтиб улгурди.

“Бирменгем” тарбияланувчиси бўлган ва икки йил аввал 1,75 миллион евро эвазига “Сандерленд”га кўчиб ўтган Жоб айни пайтда 22 миллион еврога баҳоланмоқда.