“Барса” яна бир супертрансферга қўл уряпти

Испаниянинг амалдаги чемпиони “Барселона” имкон қадар таркибини юқори малакали ижрочилар билан кучайтиришга алоҳида эътибор қаратмоқда.

Бир неча манбаларнинг ёзишича, каталонияликлар бу гал франциялик ҳужумчи Кристофер Нкункуни нишонга олди.

ПСЖ тарбияланувчиси бўлган 27 ёшли футболчи икки йил муқаддам “Лейпциг”дан “Челси”га олиб келинган эди. Бироқ шу пайтгача у Англия фуболига мослаша олмади. “Аристократлар”га 60 миллион еврога тушган бу трансфер ўзини оқламади.

Энди “Барселона” ҳужумчи атрофида юзага келган вазиятдан фойдаланиб, Нкункуни ўз сафига қўшиб олмоқчи.

Каталония клуби Нкункуни Фермин Лопеснинг ўрнига олиб келади. Ўз навбатида, Лопес Англияга йўл олиши кутиляпти. Чунки бу футболчига “Манчестер Сити” бош мураббий Хосеп Гвардиола жиддий қизиқиш билдиряпти ва трансферни амалга оширишга уриняпти.