"Арсенал"нинг собиқ футболчиси Чемпионшипга равона бўлди

"Арсенал"нинг собиқ ҳимоячиси Калум Чемберс Уэльснинг "Кардифф Сити" клубига кўчиб ўтди. Бу ҳақда клуб матбуот хизмати хабар берди.

Манбага кўра, 29 ёшли англиялик футболчи янги жамоасига эркин агент сифатида текинга бориб қўшилган. Томонлар ўртасидаги келишув эса уч йилга имзоланган.

Чемберснинг бундан аввалги жамоаси “Астон Вилла” эди. У Бирмингем клубига икки йил олдин Лондоннинг "Арсенал" жамоасидан кўчиб ўтган эди. Трансфермаркт ҳимоячининг нархини 4 миллион еврога баҳоламоқда. "Кардифф Сити" ўтган мавсумни Чемпионшипда ўтказди ва 12-ўринни эгаллади.