Allegri Modrichdan o‘z tajribasini yosh jamoadoshlariga o‘rgatishini talab qilyapti

"Milan" futbolchisi Luka Modrich jamoa bosh murabbiyi Massimiliano Allegrining talablari haqida so‘zladi.

Xorvatiyalik yarim himoyachi ham, italiyalik murabbiy singari, yozda klubga kelgan edi. 39 yoshli futbolchi "rossonerilar"ga A Seriyadagi ilk g‘alabasini qo‘lga kiritishda yordam berdi va ikkinchi tur doirasida "Lechche"ga qarshi o‘yinda (2:0) golli uzatmani amalga oshirdi.

- Allegri mendan maydondagi harakatlarimiz ravon bo‘lishini ta’minlashimni so‘rayapti. Shuningdek, murabbiy o‘yinlar davomida jamoadoshlarim bilan doimiy ravishda muloqot qilishimni istaydi, sababi jamoamizda yosh futbolchilar ko‘p, ularda ishonch uyg‘otish zarur, - dedi Modrich.

Italiyaga ko‘chib o‘tishidan oldin yarim himoyachi 13 yil davomida Madridning "Real" klubida o‘ynagan va uni erkin agent sifatida tark etgan edi.