"Аббос Файзуллаев ўйнагани учун бизда яхши ўйинчилар кўплигини билишади" ёхуд ЦСКАда ишлаётган ўзбекистонлик мураббий

Россиянинг ЦСКА клубида ўзбекистонлик мураббий ишлаётганидан хабарингиз борми?

Айни пайтда ушбу жамоанинг ўринбосарларида бизнинг ҳамюртимиз Денис Коростиченко фаолият олиб бормоқда. У ЦСКА ёшлар жамоаси мураббийлар штабида ишлаб келмоқда.

Яхши биласиз, бунгача у Суперлигамизда “Локомотив”, “Олимпик” каби жамоаларни бошқарган.

Sports.uz журналисти Коростиченко билан боғланди.

- Денис Владимирович, сизни ЦСКА клубида иш бошлашингиз қандай юз берди? Ким сабабчи бўлди?

- Мени яқин дўстим. Дмитрий Игорьевич Игдисамов! Биз у билан ёшлик пайтимизда “Сергели”да бирга ўйнардик. У 2001 йилда Россиянинг Қозон шаҳрига кўчиб кетди. Ўша ерда фаолият олиб борди ва “Рубин” академиясида иш бошлади. Яхши натижалар кўрсатди. Уни 6 йил олдин ЦСКАга чақиришди. Шу вақт мобайнида ушбу жамоада ҳам ижобий натижалар кўрсата олди, чемпионликка эришди ва 6-7 нафар футболчини чиқарди. Булар - Кисляк, Глебов, Бандикян, Редно, Абдулкадиров...Шунинг учун раҳбарият унга мени таклиф қилишига рухса берди ва шу тариқа, ЦСКА ёшлар жамоасида иш бошладим.

- ЦСКА ёшлар жамоасида ишлаш сиз учун янги тажриба. Энг аввало, сизга ёққан нарса нима бўлди?

- Ёққани - биринчи навбатда шароитлар. Ҳамма нарса бор. Нимадир айтсангиз дарҳол қилиб беришади. Майдон ва тренажёр заллари ажойиб. Тиббиёт бўйича ҳам барча нарсалари бор. Тикланиш, овқатланиш, витаминизация - барчаси муҳайё.

- ЦСКА клубидаги ишлаш тизими қандай? Масалан, ёшлар жамоаси олдига қандай мақсад қўйилган?

- ЦСКА Россияда катта клуб. Мақсад - ҳар доим чемпион бўлиш. Бу жамоанинг қонида бор. Раҳбарият олдимизга иқтидорли ўйинчиларни асосий таркибга етиштириб чиқаришни доим вазифа қилиб қўяди. Асосий таркибга 1-2 та футболчи чиқарилса бу албатта вазифа яхши бажарилганини билдиради.

- Асосий жамоа бош мураббийи сизлар билан ҳам гаплашиб турадими?

- Албатта, гаплашиб турамиз. Биз ФИФА кунлари бўлганда, чемпионатдаги танаффусдан фойдаланиб асосий жамоа билан иккита ўйин ўтказдик.

- ЦСКА билан қанча муддатга шартнома имзоладингиз ва кейинги режаларингиз қандай?

- Бир йилга. Шартномам июнь ойигача. Агар ҳаммаси яхши бўлса, яна бир йилга узайтирамиз.

- ЦСКА ёшлар жамоасига бирор-бир ўзбекистонлик футболчиларни ҳам таклиф қилиш режангиз борми?

- ЦСКАда кўп селекционерлар бор. Ўзбекистондаги иқтидорларга ҳам қарашади. Аббос Файзуллаев ўйнагани учун бизда яхши ўйинчилар кўплигини билишади. Мендан сўрашса ҳам айтаман ва доим чақиришга ҳаракат қиламиз.

- Бу борада кимдир рўйхатингизда борми?

- Ҳозирча йўқ. Фақат кузатяпман. Чунки клубда 2008 йилда туғилган футболчилар асосий таркибга тортяпти. Демак, ундан ҳам пастроғига қараша керак - 2009, 2010...