"Abbos Fayzullaev o‘ynagani uchun bizda yaxshi o‘yinchilar ko‘pligini bilishadi" yoxud TsSKAda ishlayotgan o‘zbekistonlik murabbiy

Rossiyaning TsSKA klubida o‘zbekistonlik murabbiy ishlayotganidan xabaringiz bormi?

Ayni paytda ushbu jamoaning o‘rinbosarlarida bizning hamyurtimiz Denis Korostichenko faoliyat olib bormoqda. U TsSKA yoshlar jamoasi murabbiylar shtabida ishlab kelmoqda.

Yaxshi bilasiz, bungacha u Superligamizda “Lokomotiv”, “Olimpik” kabi jamoalarni boshqargan.

Sports.uz jurnalisti Korostichenko bilan bog‘landi.

- Denis Vladimirovich, sizni TsSKA klubida ish boshlashingiz qanday yuz berdi? Kim sababchi bo‘ldi?

- Meni yaqin do‘stim. Dmitriy Igorevich Igdisamov! Biz u bilan yoshlik paytimizda “Sergeli”da birga o‘ynardik. U 2001 yilda Rossiyaning Qozon shahriga ko‘chib ketdi. O‘sha erda faoliyat olib bordi va “Rubin” akademiyasida ish boshladi. Yaxshi natijalar ko‘rsatdi. Uni 6 yil oldin TsSKAga chaqirishdi. Shu vaqt mobaynida ushbu jamoada ham ijobiy natijalar ko‘rsata oldi, chempionlikka erishdi va 6-7 nafar futbolchini chiqardi. Bular - Kislyak, Glebov, Bandikyan, Redno, Abdulkadirov...Shuning uchun rahbariyat unga meni taklif qilishiga ruxsa berdi va shu tariqa, TsSKA yoshlar jamoasida ish boshladim.

- TsSKA yoshlar jamoasida ishlash siz uchun yangi tajriba. Eng avvalo, sizga yoqqan narsa nima bo‘ldi?

- Yoqqani - birinchi navbatda sharoitlar. Hamma narsa bor. Nimadir aytsangiz darhol qilib berishadi. Maydon va trenajyor zallari ajoyib. Tibbiyot bo‘yicha ham barcha narsalari bor. Tiklanish, ovqatlanish, vitaminizatsiya - barchasi muhayyo.

- TsSKA klubidagi ishlash tizimi qanday? Masalan, yoshlar jamoasi oldiga qanday maqsad qo‘yilgan?

- TsSKA Rossiyada katta klub. Maqsad - har doim chempion bo‘lish. Bu jamoaning qonida bor. Rahbariyat oldimizga iqtidorli o‘yinchilarni asosiy tarkibga etishtirib chiqarishni doim vazifa qilib qo‘yadi. Asosiy tarkibga 1-2 ta futbolchi chiqarilsa bu albatta vazifa yaxshi bajarilganini bildiradi.

- Asosiy jamoa bosh murabbiyi sizlar bilan ham gaplashib turadimi?

- Albatta, gaplashib turamiz. Biz FIFA kunlari bo‘lganda, chempionatdagi tanaffusdan foydalanib asosiy jamoa bilan ikkita o‘yin o‘tkazdik.

- TsSKA bilan qancha muddatga shartnoma imzoladingiz va keyingi rejalaringiz qanday?

- Bir yilga. Shartnomam iyun oyigacha. Agar hammasi yaxshi bo‘lsa, yana bir yilga uzaytiramiz.

- TsSKA yoshlar jamoasiga biror-bir o‘zbekistonlik futbolchilarni ham taklif qilish rejangiz bormi?

- TsSKAda ko‘p selektsionerlar bor. O‘zbekistondagi iqtidorlarga ham qarashadi. Abbos Fayzullaev o‘ynagani uchun bizda yaxshi o‘yinchilar ko‘pligini bilishadi. Mendan so‘rashsa ham aytaman va doim chaqirishga harakat qilamiz.

- Bu borada kimdir ro‘yxatingizda bormi?

- Hozircha yo‘q. Faqat kuzatyapman. Chunki klubda 2008 yilda tug‘ilgan futbolchilar asosiy tarkibga tortyapti. Demak, undan ham pastrog‘iga qarasha kerak - 2009, 2010...