Фарҳод Бекмуродов: "Локомотив"га янада кучлироқ бўлиб қайтаман

“Андижон” Суперлигага қайтиш йўлида таркибини кучайтираётганидан хабарингиз бўлса керак. Яқинда андижонлик ярим ҳимоячи Фарҳод Бекмуродов ҳам ўз клубига қайтиб келди. У мавсум бошида чемпион жамоа – “Локомотив” сафида фаолиятини бошлаганди. Орадан ярим йил ўтгач, андижонликлар Бекмуродовни яна ортга қайтаришга қарор қилдилар. Айтиш керакки, Фарҳоднинг “Локомотив”да асосий таркибидан жой олиши бир мунча қийин кечди. Андижонликлар эса унинг захирада ўтиргандан кўра ўз жамоасига қайтиб ёрдам беришини хоҳлашди. Футболчи SPORTS.uz муҳбири билан бўлган суҳбат давомида “Локомотив”да ўтказган таассуротлари билан ўртоқлашди.

- Худога шукр қиламан, чунки бундай жамоа таркибида тўп суриш ҳар кимга ҳам насиб қилавермайди. Охирги йиллардаги икки карра Ўзбекистон чемпиони ва Кубоги соҳиби бўлган жамоа рақобат ҳам шунга яраша кучли экан. Бу ерда фақат яхши ўйинчилар жамланган. Биласизми, у ердаги ҳар бир машғулот ва ўйиндан ўзим учун нималардир ўргандим. Шу боис бу борада ўзимда озми-кўпми, ўсиш бўлди деб ўйлайман. Чунки “Локомотив”нинг машғулотлари расмий ўйинлардан қолишмайди. У ерда асосан профессионал футболчилар тўп суришади. Мен эса уларга қараб интилавердим.

Яна бир гап: Фарҳод Бекмуродов “Андижон”дан “Локомотив”га кўчиб ўтганида фаолиятида олдинга қадам ташлагани ҳақида айтганди. Хўш энди-чи? Футболчи амалдаги чемпион жамоа сафидан про-лигага қайтганини қандай эътироф этаркин?

- Тўғри, ҳар доим чемпион жамоа сафини тарк этиш ёқимли туюлмайди. Лекин “Андижон” ҳам ёмон жамоа эмас. Мен шу ерда ўсиб улғайдим, катта бўлдим. Айнан ушбу клубда Фарҳод Бекмуродов сифатида шаклланиб бордим. Албатта, ўтган йилги хатолардан хулоса чиқардим. Мен “Андижон” жамоасининг Суперлигага чиқишига ёрдам бериш учун келдим. Насиб қилса, бу сафар ўз олдимизга қўйилган вазифани чиройли тарзда уддалаб, кўп минг сонли мухлисларимизни хурсанд қилишга ҳаракат қиламиз.

“Локомотив” ҳам ёзги йиғин чоғида таркибига бир қатор етакчиларни қўшиб олди. Айниқса, чемпионатимизда трансфер ойнаси ёпилаётган маҳалда Анзур Исмоилов, Термурхўжа Абдуҳолиқов ва россиялик Николай Погребнякнинг қўлиб олингани ҳам таркибдаги рақобатни янада кучайтирганига шубҳа йўқ. Балки ушбу ўйинчиларнинг келиши ҳам Бекмуродовнинг “Локо”дан кетишини тезлаштириб юборган бўлиши ҳам мумкин. Боиси унгача Фарҳоднинг “Андижон”га қайтиши борасида айтарли ҳеч гап йўқ эди.

- Ҳа, шундай деса ҳам бўлади. “Навбаҳор”га қарши ўйиндан сўнг бош мураббий Андрей Витальевич билан кўришиб гаплашдим, - дея мавзуни давом эттирди, футболчи. - Унга “Андижон”га қайтиб яна ўйнаш ниятим борлигини, бунинг учун рухсат беришини сўрадим. Чунки мени “Локомотив”га Фёдоровнинг ўзи чақирганди. Ўзаро мулоқотдан кейин мураббий майли, хоҳишинг, аммо биз билан қолсанг ҳам бўлаверарди деди. Қолаверса, “Андижон” бош мураббийи Элдор Сакаев ҳам менга қўнғироқ қилди ва у билан ҳам гаплашиб турдик. У ҳам менинг тезроқ қайтиб жамоага ёрдам беришимни истаётганди. “Андижон” жамоасида 2017 йилга қараганда ўзгаришлар яхши шекилли деб ўйлайман. Жамоамга яқиндагина қўшилдим.

Бекмуродовнинг қайтгани “Андижон” ўйинини бироз бўлса-да кучайтириши кутиляпти. Чунки Суперлигага чиқиш учун жиддий курашаётган жамоага ҳозирда унга ўхшаган ўйинчилар керак.

- Албатта, “Андижон”нинг Суперлигага чиқиш имкониятлари яхши. Ўтган йилги хатоларни такрорламаймиз деган умиддаман. Бунинг учун жамоани Суперлигага олиб чиқишга ҳамма ҳаракат қиляпти, - дея муносабат билдирди, Бекмуродов.

Шу ўринда бир савол туғилади: Андижонлик иқтидорли ўйинчи ярим мавсум давомида “Локомотив” шарафини ҳимоя қилган ҳолда ўзи учун нимага эришди? Нимани ўрганди?

- “Локомотив” жамоасида тўп суриб биринчи навбатда ғолиблик руҳиятига эриша олдим. Айнан шу нарса менга жуда катта таъсир кўрсатди. Руҳият жуда муҳим роль ўйнайди. Бундан ташқари, бироз бўлса-да, тажриба ҳам тўпладим деб ўйлайман. У ерда барча футболчилар билан ажойиб муносабатда эдик. “Локо”даги хонадошим Идрис Бикмайкин эди, шу боис кўпроқ у билан бирга бўлардим, - дея фикр билдирдим, Бекмуродов.

Лекин барибир “Локомотив” ўз номи билан “Локомотив”. Юқорида унинг ҳам айтганидек, ҳар кимга ҳам ушбу клуб таркибида тўп суриш насиб қилавермайди. Гарчи Фарҳод кўпроқ захирада қолиб кетган бўлса-да, ушбу жамоанинг аъзоси эди. Шу боис у ердан кетганидан афсусланмаяптими?

- Ҳа, тан оламан, озгина бўлса ҳам афсусланиш бор. Лекин насиб қилса, янада кучли бўлиб қайтаман. Ўзимга ишонаман. Насиб қилса, ўтган йилги хатолардан хулоса чиқариб, янги чўққиларга чиқишга ҳаракат қиламан.

Фарҳоднинг укаси Фарруҳ Бекмуродов ҳам акаси сингари футболчиликни орзу қилганди ва ўтган йили ака-укалар “Андижон” таркибида биргаликда тўп суришиб, ёмон таассурот қолдиришмаганди. Аммо йилнинг бошида катта Бекмуродов “Локо”га кетгач, укаси ҳам “Андижон”да кўринмай қолди ва ҳозирда унинг қаерда эканлиги ҳам номаълум эди. Бу билан яна бир иқтидор эгаси йўқ бўлиб кетаётгандек..

- Укам – Фарруҳ Бекмуродов ҳозирча уйда. У вилоят иккинчи лигасида Шахриҳоннинг “Раш-Милк” жамоасида ўйнаб турибди, - дея жавоб қайтарди, Фарҳод. - Кейинги йили бирор-бир клубда кўриниш бериб қолар. Ҳозирча эса айрим сабабларга кўра уйда. Менинг “Андижон”дан кетганимдан кейин Фарруҳнинг ҳам нега кетганига алоқам йўқ, у доим ўз меҳнати билан ўйнаган, ўринбосарлар сафида ҳам, биринчи лигада ҳам. Мен ҳеч қачон раҳбариятга ҳам, мураббийларга ҳам укамни ўйнатинглар деб айтмаганман. Бу йил ҳам бошида укамни “Андижон”га чақиришганди. Лекин йиғинга таклиф қилишганида Фарруҳ бироз шамоллаб қолди. Натижада йиғинларни ўтказиб юборди. Шундан кейин ўзига келиб жамоа топишда қийналди. Ўзи алоҳида шуғулланган бошқа, жамоа билан бирга шуғулланган бошқа.

Дарвоқе, Фарҳод “Локомотив”да ҳозиргидан кўра кўпроқ пул топарди. Аммо ўзининг айтишича, бу муҳим масала эмас.

- Албатта, “Локомотив” клубида молиявий томондан имкониятлар яхши бўлгани сабабли у ердаги ойлик маошим ҳам ўзим учун қониқарли эди. Табиийки, эндиликда “Андижон” шарафини ҳимоя қиламан ва иш ҳақи борасида ҳам фарқ сезилади. Лекин мен учун пул асосий ўринда эмас.

Шуҳратбек Жўраев суҳбатлашди.