Йован Жокич: "Сўғдиёна" - Суперлигадаги энг яхши ҳимояланадиган клуб, ҳар бир ўйин биз учун бирдек муҳим, мен учун лигани ютиш қизиқроқ бўларди

"Навбаҳор" жамоаси Ўзбекистон кубоги ярим финалида "Сўғдиёна"ни пенальтилар сериясига кўра мағлуб этди. Ушбу баҳсдан сўнг SPORTS.uz сайти наманганликлар легионери Йован Жокич билан алоқага чиқди ва унинг фикрлари билан қизиқди.

Ғалаба билан табриклаймиз! Биринчи савол: кечаги ўйин ҳақидаги фикрларингиз қандай?

- Ўйиндан олдин ҳам бизни жуда кўп стандартлар ва курашларга эга бўлган жуда қийин учрашув кутиб турганини билардик. Баҳс бошиданоқ гол уришга ҳаракат қилдик. Рақиб Суперлигадаги энг яхши ҳимояланадиган клуб. Уларнинг мудофаасини ёриб ўтиш осон эмас. Шунга қарамай, муҳими, мақсадимизга эришдик.

- "Сўғдиёна"да энг муаммо туғдирадиган футболчи ким эди?

- “Сўғдиёна” - жуда кўп хавфли ўйинчиларга эга бўлган жамоа. Улар аниқ узатмалар ва қарши ҳужумларда хавфли. Шунинг учун ким хавфлироқ эканини айта олмайман.

- Пенальтилар серияси вақтида ўзингизни қандай ҳис қилдингиз?

- Кўрганинигиздек, оғир-босиқлик билан бажардим. Фақат жамоамга ёрдам бериб, финалга чиқиш ҳақида ўйладим.

- Финалда жамоангиз “Насаф” билан ўйнайди. Бу мавсумнинг энг муҳим ўйини бўлиши мумкинми ёки муҳимроқ ўйинлар олдинроқ бўлиб ўтдими?

- Ҳар бир ўйин биз учун бирдек муҳим. Шундай экан, финал ҳам бу мавсумдаги энг муҳим ўйинлардан бири.

- “Насаф”нинг энг хавфли футболчиси...

- Энг хавфли "Насаф" футболчиси.. Агар бунга жавоб беришим шарт бўлса, бутун жамоани санаб ўтишим керак бўлади (кулади).

- Жамоанинг асосий мақсади Суперлигами ёки кубок?

- Иккисида ҳам ғалаба қозонишни хоҳлаймиз. Агар омадимиз келса, иккисини ҳам ютамиз. Аммо мен учун лигани ютиш қизиқроқ бўларди.

Жалолиддин Қобилжонов суҳбатлашди.