Яхшибоев супергол билан нуфузли совринни қўлга киритди (видео)

Қозоғистон Премьер-лигаси 2024 йилги мавсум якунига кўра, турли номинациялар бўйича ғолиблар номини эълон қилди.

Мавсумни чемпион жамоа – “Ордабаси”да ўтказган Жасурбек Яхшибоев ҳам индивидуал совринга эга бўлди. Қозоғистон Премьер-лигаси ўзининг расмий телеграмм каналида сўровнома ўтказиб, мавсумнинг энг чиройли голини аниқлади.

Сўровноманинг якуний финал босқичига икки футболчи – “Актобе” вакили Дорни Ромеронинг “Женис” ва “Ордабаси” тўпурари Жасурбек Яхшибоевнинг 21-турда “Астана” дарвозасига урган голи етиб келди.

Ҳал қилувчи танловда Жасурбек 82 фоиз овоз билан Дорни Ромерони (18) ортда қолдирди.

Жасурбек Яхшибоев ижросидаги мавсумнинг энг зўр голини қуйидаги линк орқали томоша қилишингиз мумкин:

https://www.youtube.com/watch?v=_ij-OlEHCPk

Жасурбек Яхшибоев мавсум давомида чемпионат тўпурарлар пойгасида иштирок этди. Чимкентликлар шарафини ҳимоя қилган легионеримиз Премьер-лиганинг 17 та ўйинида иштирок этиб, рақиблар дарвозасини 9 маротаба ишғол қилди.

Бироқ, чемпионатнинг охирги қисмига келиб, Жасурбек ҳакамни туртиб юборгани учун Тартиб-интизом қўмитаси томонидан тўртта учрашувга дисквалификация қилинди ва сўнгги учрашувларни ўтказиб юборишига тўғри келди. Шу боис, 27 ёшли футболчимиз тўпурарлар пойгасидан эрта чиқиб кетди.

Чимкентликлар сафида яна бир легионеримиз – Шаҳбоз Умаров ҳам ўйнади. 25 ёшли ҳужумкор футболчи 2023 йилги чемпионлик мавсумидан кейин ҳам “Ордабаси”да қолган эди. Умаров чемпионатда 21 та учрашувда қатнашиб, бир жуфт гол ҳам урди.

“Ордабаси” эса, мавсумни тўртинчи поғонада якунлаб, совринлар сафидан четда қолиб кетди ва чемпионлик унвонини “Қайрат”га бой берди.

Гарчи Жасурбек Яхшибоев ва Шаҳбоз Умаров чемпионат медалларидан қуруқ қолган бўлса-да, бу гал чемпионлик бошқа легионеримиз – Иброҳимхалил Йўлдошевга насиб қилди.

Иброҳимхалил аслида Россиянинг “Нижний Новгород” жамоасига тегишли ва “Қайрат” сафида ижарада тўп тепди.

23 ёшли қанот ҳимоячиси қозоқ клубида барча турнирларда жами 23 та учрашув ўтказиб, ҳимоядаги вазифаларини бажаришдан ташқари иккита гол ва тўртта ассист муаллифи бўлди. Шу тариқа, жамоасининг чемпионлигига муносиб ҳисса қўшди.

Қозоғистон Премьер-лигасида тўп тепган тўртинчи футболчимиз Шоҳназар Норбеков бўлди. 30 ёшли марказий ҳужумчи чемпионатда “Қайсар” сафида 23 та учрашувда ҳаракат қилди, рақиблар дарвозасини бир бор ишғоли қилиб, жамоадошларига тўртта голли пас узатди.

Гвардиоланинг Ҳусановга муносабати ҳақида ёзишди

Машҳур мураббий Ҳусановни ўз жамоасида кутяпти...

Файзуллаев қандай қизга уйланишини айтди