Ямал “Барса” афсонасини клубга “киритмаяпти”
- 10-март 2025, 00:00
- Zohir Toshxo’jayev
- 1
- Футбол
Бразилиянинг энг ёрқин юлдузларидан Неймар ёзги трансферлар ойнаси даврида собиқ жамоаси “Барселона”га қайтишга ҳаракат қилади.
Айни пайтда унинг агентлари каталонияликлар билан музокара ўтказмоқда. 33 ёшли футболчи “Сантос”да узоқ қолмоқчи эмас.
El Nacional нашрининг маълум қилишича, “Барселона”нинг айрим ёш ўйинчилари жамоага Неймарнинг келишига қаршилик кўрсатяпти. Хусусан, 17 ёшли Ламин Ямал буни истамаяпти. Фермин Лопес ҳам бу борада жамоадошини қўллаб-қувватламоқда.
Ҳар икки футболчи Неймарнинг келиши жамоа муҳитини бузишидан ва бу натижаларга ўз таъсирини ўтказишидан хавотирда.
Қолаверса, “Барселона” футболчилари орасида Неймар германиялик бош мураббий Ханс-Дитер Флик қўллаётган ўйин схемасига мос тушмаслигини таъкидлаяпти. Фликнинг ўзи ҳам Неймарни таркибга қўшмоқчи эмас.
Бразилиялик юлдузнинг келишига клуб хўжайини Жоан Лапорта қизиқмоқда. Каталония клуби мутасаддилари агар Неймар ёзгача “Сантос” сафида 15 та гол ура олса, унинг юқори спорт формасига қайтганига ишонишларини ва шу орқали бу трансферга йўл очилиши мумкинлигини билдирган.