Умаровнинг Абрамов билан суҳбати қандай кечди? Убайдуллаевдан нега хавотирга тушди? Термага чақирилмаганидан хафами?

Беларусь чемпионатида ўзини кўрсатаётган легионеримиз – Шаҳбоз Умаров охирги пайтларда тез-тез тилга олиняпти. Ортда қолган 9 та ўйинда футболчимиз барча ўйинларда майдонга тушди ва рақиблар дарвозасига 3 та гол урди ва яна 2 та голга ассистентлик вазифасини бажарди.

Ҳужумкор ярим ҳимоячи БАТЭда ўз жойини топаётгани биз учун қувонарли. У ерда анча ўсишга эришяпти. Умаров терма жамоага муносибми? Ҳозирча Вадим Абрамов уни йиғинга чақиришга шошилмаяпти.

Бу сафарги ташкил этиладиган машғулотларга уни жалб қилмади. Бу эса турли саволларни келтириб чиқаряпти. Шуни инобтга олиб sports.uz мухбири БАТЭда тўп сураётган легионеримиз билан алоқага чиқди.

- Вадим Абрамов миллий терма жамоанинг кенгайтирилган таркибини эълон қилди. Кўпчилик бу сафар сизни ҳам таркибда кўришни истаганди. Термадан чақирув олишингизни ўзингиз ҳам кутаётганмидингиз?

- Мен ҳозир бу ҳақида ўйлаётганим йўқ. Бор эътиборимни чемпионат ўйинларига қаратганман, аниқроғи, жамоамнинг машғулоти ҳамда ўйинларига. Шу сабабли, саволингизга бирор нима дея олмайман. Терма жамоага чақирилган ўйинчилар рўйхатини кўрдим. У ерга энг кучли футболчилар чақирилган. Улар ҳозирги кунда энг кучли ўйинчилар ҳисобланади. Яна қайтараман, мен бор эътиборимни клубимга қаратганман. Ҳозирги пайтда биз ҳар бир учрашувда максимал тарзда ғалаба қозонишимиз керак. Хатога йўл қўйишга ҳаққимиз йўқ. Турнир жадвалида “Шахтёр”дан орқада қоляпмиз. Шу сабабдан ҳар бир ўйин биз учун жуда муҳим.

- Яқинда Вадим Карленович Беларусга бориб сизнинг ўйинингизни стадиондан кузатди. Ўшанда мураббий билан гаплашганмисиз?

- Ҳа, келди. Биз ўйиндан кейин кўришдик. Менга камчиликларим билан бирга яхши жиҳатларимни ҳам айтиб ўтди. Вадим Карленович билан озгина суҳбатлашдик холос.

- Абрамов билан гаплашганингиздан кейин энди мени ҳам терма жамоа йиғинига чақиради, деган ўй-хаёлларга берилдингизми?

- Ҳа, шунчаки келган, деб ўйламайман. Худо хоҳласа, мени ҳам албатта чақиради. Мендан эса машғулотларда фақат ўз устимда ишлаш талаб қилинади. Қолганини вақт кўрсатади.

- Сир бўлмаса, бош мураббий билан суҳбат қандай кечди?

- Мураббий ўйинни кўргач, айнан ўша битта учрашувдан келиб чиқиб ўз фикрини айтди, қаерда хато қилганимни тушунтирди. Ўртамиздаги айтилган ҳамма гапларни ҳам оммага ошкор қилсам нотўғри бўлади.

- Менимча, терма жамоага жалб қилинганлар рўйхати чиққанида сиз ҳам катта қизиқиш билан кўрганингиз табиий. Фамилиянгиз йўқлиги кайфиятингизга таъсир қилмадими?

- Ҳа, рўйхатни менга дастлаб дўстларим жўнатишди. Аниқроғи, улар рўйхатда қанисиз, деган маънода юбордилар (кулади). Мен бунга тўғри ёндашдим. Демак, ҳали ишлашим лозим. Ўзимни яхши томондан янада кўпроқ кўрсатишим керак. Бу нормал ҳолат. Ҳаммасини тўғри қабул қилдим. Бу ҳеч қанақа хафа бўладиган вазият эмас. Боя айтганимдек, ушбу рўйхатни кўриб кучли футболчилар йиғилганини кўрдим.

- Клубдаги ишларингиз қандай? Жамоадошларингиз сизни терма жамоадан чақирув олмаётганингизга қандай муносабат билдиришяпти?

- Нимага сени чақиришмаяпти, деб кўп савол беришади. Уларга билмайман, деб жавоб қайтараман. Шунингдек, терма жамоамиз таркиби кучли, ҳали ёшман, деб айтяпман.

- Легионерга айлангач, анча-мунча ўсишга эришаётганингиз ҳақида кўпчилик айтяпти. Бу ўйинларингиз ва голларингиз орқали ҳам билиняпти. Терма жамоадан чақирув олиш учун яна нима қилиш керак, деб ўйлайсиз? Ёки бу саволга жавоб топа олмаяпсизми?

- Балки мен терма жамоанинг тактикасига мос эмасдирман. Ҳамма мураббийнинг ўз тактикаси бор. Шу пайтгача миллий термага чақирилмаган футболчини бирданига жалб қилиб, Саудияга олиб кетса ҳам бу бироз ғалатимасми? Худо хоҳласа, менимча кейинчалик чақирилсам керак. Мен тўғриси, ўзимдан ҳам кўра, кўпроқ дўстим Шаҳзод Убайдуллаевдан хавотирда бўлиб тургандим, чунки етарли даражада ўйин амалиётига эга бўла олмаётганди.

- Тўғри айтасиз. Барибир натижага бош мураббий жавоб беради. Саудия Арабистонида эса бизни жуда муҳим ўйинлар кутяпти. Шахсий фикрингиз бўйича терма жамоамизнинг у ердаги имкониятини қандай баҳолаяпсиз?

- Кучли футболчилар йиғилган. Умид қиламанки, албатта ўзимиз кутган натижага эришамиз.

- Убайдуллаевдан фарқли ўлароқ, сизда ўйин амалиёти бўйича фаоллик бор эди. Адолат нуқтаи назаридан олиб қараганда бу вазиятга нима дейсиз?

- Мен Убайдуллаевнинг термага яна таклиф қилинганидан хурсандман. У менинг яқин дўстим. Шаҳзод бунгача ҳам бир нечта йиғинда иштирок этди. Убайдуллаев терма жамоамизнинг қандай тактика бўйича ишлаётганини яхши билади. Мени эса бундан хабарим йўқ. Мана шу жиҳатларни ҳам ўйлаш керак, тўғрими? Мен билан Шахзодни солиштирсак, мунтазам чақирилаётгани учун уни албатта яна термага таклиф қилишлари тўғри. Менга эса ҳали вақт келади, деб умид қиламан.

- Бу фикрларингиз орқали камтарлик қилиб, дўстингизга ҳурматни сақлаган ҳолда жавоб беряпсиз, деб ҳисоблаяпмиз...

- Тўғри маънода олиб қаралганда ҳамма гапларим рост.