Умар Эшмуродов: "Ўзбекистон жамоалари молиявий томондан яхши таклиф беришди"

2024 йилнинг февраль ойида “Насаф”дан Малайзиянинг “Селангор” клубига йўл олган Умар Эшмуродов бир йилдан сўнг яна собиқ клубига қайтди.

Умар “Селангор”да 19 та ўйинда майдонга тушиб, 1 та гол урди ва 1 та голли пас узатди. Бу йил эса Эшмуродовни қайтариш учун Суперлиганинг етакчи клублари жиддий таклифлар билан чиқишди. Якунда “Насаф” ўз футболчсини ортга қайтарди.

Умар Эшмуродов эса Sports.uz учун интервью берди.

- Умаржон Малайзиядан кетишингизга нима сабаб бўлди?

- Клубдан кетишимнинг асосий сабаблари жамоа билан Чемпионлар лигаси гуруҳ босқичида қолиб кетдик. Гарчи биз гуруҳда 10 очко олишни уддалаган бўлсак-да, ўтолмадик ва қўшимчасига Ўзбекистон жамоалари ҳам молиявий томондан яхши таклиф беришди.

- “Насаф” клубига қайтишингиз сиз учун олдинга қадамми ёки аксинчами?!

- Олдинга қадам деб ҳисоблайман. Чунки жамоа билан Элит Чемпионлар лигасида ўйнаймиз ва Ўзбекистон чемпионати ҳамда Кубогида ҳам бош соврин учун мақсад бор. Имкон қадар жамоага ёрдам бераман.

- Эшитишимизча, Малайзия клубларида молиявий муаммолар кўзга ташланмоқда. Шу нарса ҳам кетишингизни асосий сабабларидан бирими?

- Йўқ, ҳеч қандай молиявий муаммо бўлмаган. Мени клубимга ва менежерларига, бош мураббий, жамоадошларим ва албатта жамоанинг жуда катта мухлисларига раҳмат айтаман. Улар мени биринчи кундан бошлаб қўллаб-қувватлашган.

- Билишимча, сизда “Нефтчи” варианти ҳам бор эди. Нега бу амалга ошмади?

- Албатта, бунга “Насаф” сабабчи. Чунки мени атрофимдаги ҳамма “Насаф” жамоасига бефарқ эмас. Шунинг учун бошқа клублар билан музокараларимиз охирига етмаган.

- Малайзиядаги фаолиятингиз ўзингизга ҳар томонлама ёқдими ёки нимадандир кўнглингиз тўлмадими?

- Бироз қийинчилик бўлди. Лекин, умуман олганда, яхши ўтказдим.

-  “Насаф” билан янги мақсадингиз қандай?

- “Насаф” ҳар доим юқори мақсадлар учун курашади. Шунга монанд мен ҳам ушбу ҳолатга тайёр бўлиб жамоага ва жамоадаги ёшларга қўлимдан келганича ёрдам бераман.

Шуҳратбек Жўраев.