Улуғбек Бақоев жамоасининг йирик ҳисобдаги ғалабасидан сўнг қандай фикрда?

Суперлиганинг 3-туридан ўрин олган "Хоразм" - "Бухоро" (1:4) ўртасидаги учрашувдан кейин меҳмонлар бош мураббийи Улуғбек Бақоев матбуот анжуманида иштирок этиб, қуйидаги фикрларни билдириб ўтди. 

- Ўйинни яхши бошладик ва гол урдик. Голдан сўнг бўшашдик ва имкониятларни бой бера бошладик. "Хоразм" ташаббусга эгалик қилишга ўтди. Гол ҳам уришлари мумкин эди. Иккинчи бўлимда ҳам вазият шундай кечди. "Хоразм" гол ургандан кейин яхши ўйин намойиш этишга киришди. Жамоамизни ғалаба билан табрикламоқчиман. "Хоразм"га эса кейинги ўйинларда омад тилайман. 

- Кетма-кет иккинчи ўйиндирки, "Бухоро" ҳисобда олдинда бора туриб, вақтни чўзмоқда...

- Вазиятларни қайта кўриб чиқиш керак. Айнан қайси вазият эканлигини кўриш лозим. Балки ўша пайтда кичик жароҳатлар, ўйин қоидалари бузилиши бўлгандир. Ўша вазиятни яна қайта кўриб чиқиш керак. Мен ўйин вақтини чўздик, деб ўйламайман. Шароит шуни тақозо этди. Бу футбол ва футболда бундай ҳолатлар бўлиб туради. Бу нормал ҳолат.