“Тишлоқи” шарафига айтилган 10 та машҳур иқтибос

“Аякс” ижрочи директори Рик ван ден Буг Суарес ҳақида шундай деган эди: “Луис “Аякс”га муносиб обрў билан келган бўлса-да, “катта” ўйинчи эмас эди, аммо тез орада етакчиликни қўлга олди. У бошқалардан ажралиб турарди. Унинг ажойиб голлари ва клубимиз учун қилган ҳаракатларини ҳеч қачон унутмаймиз. Бизнинг мухлисларимиз уни жудаям ардоқлашади”.

Брендан Рожерс: “У жаҳон футболининг истеъдодли футболчиси ҳисобланади. Футбол бир жойда тўхтаб турмайди, фақатгина вақт унинг қандай марраларни забд этишини кўрсатиб бера олади”.

Стивен Жерард: “Менимча, кимдир Луис Суаресга қарши ўйинни орзиқиб кутмаса керак, чунки у моҳир ўйинчи ҳамда хавфли рақиб. У фантастик шерик ва эҳтимол мен билан тўп сурган энг яхши жамоадошдир”.

Жейми Каррагер: “Луис "Ливерпулда" ўйнаган энг буюк футболчилардан бири, холос. Барча замон ва даврларнинг энг буюк одамлари ҳақида баҳс олиб борсангиз, у албатта энг кучли бешталикдан ўрин олади. Унинг ҳаракати ва урган голлари ўйин давомидаги энг унутилмас лаҳзаларга айланиб қолган. Барчангиз бизнинг таркибимизда энг яхши ўйинчилар, энг яхши истеъдод эгалари тўп сурганлигига гувоҳ бўлгансиз ва айнан Луис 2013-йил охири ва 2014-йилнинг биринчи ярмида “Ливерпуль” чўққисини забд эта олди”.

Суарес Кьеллинини тишлаб олгандан кейин Диего Марадона шундай деган эди: “ФИФА киритган санкциялар шармандаликнинг ўзгинаси, улар мухлисларга нисбатан нохақлик қилишди. Шунингдек, улар Луиснинг қўлларини кишанлаб, Гуантанамо қамоқхонасига ҳам ташлашлари мумкин эди. Ачинарлиси, улар ғалабага эришган йигитнинг карьерасини йўққа чиқаришди. ФИФА ахлоқ қоидалари ҳақида гапирмай қўяқолай. Суарес ҳеч кимнинг ҳаётига зомин бўлмади. Бу адолатсиз жазо”.

Жерар Пике: “У тишлайдими, йўқми менга бутунлай фарқи йўқ. Аввал тишлаган бўлса ҳам аҳамиятсиз. Суарес ўзини бундай тутиш нотўғрилигини билади, аммо ўйинчи сифатида кучли учлик ёки бешликдан жой эгаллайди, шу сабабли уни ўз клубимда кўришдан мамнунман”.

Кристиан Родригес: “Суарес бекорчилик билан машғул эмас, рақибларини эзиб ташлайди ва ўзини “кўча” ўйинчиси каби тутади, шу сабабдан у мен учун дунёдаги энг яхши ўйинчидир”.

Луис Энрике: “Луис жарима майдончасида ҳар қандай вазиятни ўз фойдасига ҳал этишга қодир бўлган “қотил”. Агар биз унинг ҳимоячиларга кучли босим ўтказишини ҳисобга олсак, унинг ўрнини ҳеч ким боса олмаслигини тушуниб етамиз”.

Тьерри Анри: “Суаресда футбол учун керакли қобилиятлар мавжуд: у жанг қилади, яхши ҳаракатлканади, тўғри келадиган ёшда ва албатта гол ура олади. У жамоа учун кўп нарса бериш имкониятига эга ва “Барселона” учун айнан шу жиҳати жуда муҳимдир”.

 

Сандра Алиссон таржимаси