Тьерри Анри: "Артетада етарлича вақт бор эди"

"Арсенал" афсонаси Тьерри Анри ҳозирги мураббий Микель Артета бошчилигидаги собиқ жамоаси учун самарали ҳужумчи топиш масаласига муносабат билдирди.

Анри жорий мавсумдаги муаммоларнинг бир қисмини жароҳатлар билан изоҳлаш мумкинлигини тан олди, бироқ унинг фикрича, қолган муаммоларни Артета кучли ҳужумчи топиш орқали ҳал қилиши мумкин эди.

"У Стерлингни олиб келди, ҳамма клубга "тўққизлик ҳужумчи" истаётган эди. Артетани страйкер сотиб олишга вақти бор эди. Мен мураббий эмасман ва музокаралар қандай кечаётганини билмайман, лекин "Арсенал"нинг мувоффақиятсизликларига сабаб қилиб, марказий ҳужумчи йўқлиги кўрсатилади", — дея Анрининг сўзларини Independent нашри келтирди.

Анрининг фикрича, ҳозирда Мадриднинг "Атлетико" клубида ўйнаётган Хулиан Алварес "тўпчилар"га катта фойда келтира олган бўларди.

"Алварес — ҳозирги энг севимли ҳужумчиларимдан бири. Прессинг қилади, ёлғиз ўзи ўйнай олади. Яқинда у қандай жарима зарбаси йўллаганини кўрдингизми? Мен уни "чарчаб қолдим" деганини ҳеч қачон эшитмаганман."

Якунига етган мавсумда "Арсенал" Англия Премьер-лигасида 2-ўринни эгаллади. Лондонликлар чемпион "Ливерпуль"дан 10 очкога ортда қолди.