Тер Штеген ёлғон маълумот тарқатган ОАВ ходимларини қоралади

"Барселона" ва Германия терма жамоасининг 32 ёшли дарвозабони Марк-Андре тер Штеген Испания оммавий ахборот воситаларида рафиқаси унга хиёнат қилгани ҳақидаги миш-мишлар юзасидан оммавий баёнот берди.

"Ҳурматли жамоатчилик, "Catalunya Radio" ва "3Cat Group" медиа компаниясидаги ёмон бошқарув ҳамда раҳбарлик ва назоратнинг йўқлиги мени ларзага солди ва ҳафсаламни пир қилди. Улар ёлғон хабарлар тарқатиш ва шахсий ҳуқуқларни бузиш билан шуғулланмоқда.

Бу радионинг журналистлари ёлғончи бўлиб, сохта хабарлар тарқатиб, рафиқам Даниэлани ва унинг обрўсини оммавий равишда ҳақорат қилмоқда.

Даниэла томонидан ҳеч қандай хиёнат бўлмаган. Бу ҳақиқат. Биз Дани билан ўзаро келишиб, турли йўллардан боришга қарор қилдик. Бироқ, дўстона муносабатларимизни сақлаб қоламиз.

Етакчи давлат оммавий ахборот воситаларининг Даниэлани ноҳақ айблаб, бу маълумотларни тарқатишини мутлақо қабул қилиб бўлмайди" - дея ёзди тер Штеген ижтимоий тармоқларда.