Суперлига. 1-2-тур учрашувлари саналари маълум
- 6-феврал 2025, 13:47
- Oybek Yo’ldoshev
- 0
- Футбол
1 февраль куни Суперлиганинг янги мавсумига қуръа ташлаш маросими бўлиб ўтганди. 4-февраль куни эса "Пахтакор" Элит Чемпионлар лигаси доирасида майдонга тушди.
Лига мавсум 7 март куни старт олишини ўтган йилнинг октябрь ойида маълум қилганди. Дастлабки икки тур саналарининг тўлиқ аниқ бўлиши масаласи "Пахтакор" клубининг халқаро майдондаги натижасига, шунингдек, Ўзбекистон миллий терма жамоасининг март ойидаги йиғинига боғлиқ бўлиб турганди. Боиси, "Пахтакор" Чемпионлар лигасининг 1/16 финал босқичига йўл олса, март ойининг дастлабки икки ҳафтасида 2 та халқаро ўйинида иштирок этиши лозим. Шунингдек, ЎФА Лигага алоқага чиқиб, 2-турдан ўрин олган айрим учрашувларни ФИФА кунига тақамасликни сўради.
Суперлиганинг дастлабки икки тур саналари аниқ бўлди.
Лига сана белгилаётганда "Пахтакор"нинг эҳтимолий навбатдаги босқичга йўлланма олишидан келиб чиқиб, мавсумни айнан шу клуб иштирокидаги ўйин билан бошлашга қарор қилди. Шунингдек, клубнинг 2-турдаги рақиби ОКМК иштирокидаги беллашув ҳам 7-март санасига тўғри келди. Ўз-ўзидан қолган 6 беллашув дам олиш кунларига тақсимланди.
Шунингдек, 2-тур ўйинларини белгилашда ЎФА таклифидан ҳам келиб чиқилди. Март ойи миллий терма жамоанинг келгуси тақдирида муҳим палла ҳисобланади. Фақатгина ОКМК — "Пахтакор" учрашуви санасида тўлиқ қарор қабул қилишнинг имкони бўлмади. Пахтакор Чемпионлар лигасида навбатдаги босқичга йўлланма олса, у Суперлиганинг 2-турини 16 март куни ўтказади. Агар клуб "Ал-Садд" билан ўйинда ўзи учун керакли натижага эриша олмаса, мазкур тўқнашув 14 март куни бўлиб ўтади.
Лига март ойидаги ФИФА кунларидан кейинги тақвимни ҳам ишлаб чиқмоқда. Бунда CAFA ўтказиши мумкин бўлган клублар ўртасидаги мусобақа ҳам инобатга олиниши лозим. Бироқ айрим масалалар тўлиқ ҳал этилмаганидан келиб чиқиб, мазкур мусобақа саналарида ҳам якуний тўхтамга келинмаган. Ишонамизки, жамоатчилик Лига қаршисида турган вазиятни тўғри талқин қилади.
1-тур учрашувлари саналари:
7 март
ОКМК - "Бухоро"
7 март
"Пахтакор" - "Машъал"
8 март
"Қўқон-1912" - "Андижон"
8 март
"Бунёдкор" -"Нефтчи"
8 март
"Қизилқум" - "Сурхон"
9 март
"Навбаҳор" - "Динамо"
9 март
"Хоразм" - "Шўртан"
9 март
"Насаф" - "Сўғдиёна"
2-тур саналари:
14 март
"Нефтчи" - "Қўқон-1912"
14 март
"Бухоро" - "Қизилқум"
15 март
"Андижон" - "Насаф"
15 март
"Динамо" - "Машъал"
15 март
"Шўртан"- "Бунёдкор"
16 март
"Сўғдиёна" - "Навбаҳор"
16 март
"Сурхон" - "Хоразм"
14 ёки 16 март
ОКМК - "Пахтакор"