Станоевич билан Калудерович Сербияга кетди

ФИФА кунлари муносабати билан миллий терма жамоамиз навбатдаги ўқув-машғулот йиғинларига киришгани учун Суперлигамизда танаффус юзага келганини биласиз.

Турнир жадвалида 4-ўринда бораётган “Насаф” клуби 2 октябрь куни Муборакда “Машъал”га қарши ўйиндан кейин таътилга чиққани ҳақида хабар бергандик. Маълум бўлишича, клубнинг сербиялик икки нафар легионери – Марко Станоевич ва Андрия Калудерович танаффусдан унумли фойдаланиш мақсадида ватанига бориб келиш учун клубдан рухсат олишган. Натижада “Машъал”га қарши учрашувдан кейин улар Сербияга жўнаб кетишган.

Маълумот учун, Станоевич, Суперлига баҳсларида “Насаф” сафида ҳозиргача 19 та ўйинда 6 та голга муаллифлик қилди. Калудерович эса 8 та учрашувда майдонга тушди, бироқ ҳали ҳисобига гол ёзиб қўйгани йўқ. Аммо у Ўзбекистон Кубоги ва ОФК Кубогида гол уриб келмоқда.

“Насаф” жамоаси 7 октябрь куни машғулотларга киришади. Сербиялик легионерларнинг ўша куни Қаршига етиб келиши кутилмоқда.