Сўнгги имконият: Шомуродовга уч даъвогар ва Элдор қайси клубга насиб қилади?
- 31-август 2022, 08:16
- Zohir Toshxo’jayev
- 2
- Футбол
Европанинг аксарият мамлакатларида ёзги трансферлар ойнаси ёпилишига бир кун қолганида кўплаб жамоалар ўзлари истаган футболчиларни олиш учун ҳал қилувчи ва сўнгги уринишларини амалага оширади.
Ўзбекистонлик футбол мухлисларини Элдор Шомуродовнинг келажаги қизиқтирмоқда. “Рома” бош мураббийи Жозе Моуриньо ўзбек легионерининг келажаги пойтахт “бўрилари” билан боғлиқ эмаслигини кўрсатиб қўйди.
Янги мавсумда тўртта учрашувидан бирортасида ҳамюртимизга имконият берилмади. Тўртта тур якунида кўра, ҳужумчи сифатида қайдномадан ўтказилган Тэмми Абрахам, Стефан Эл-Шаарави, Пауло Дибала барча учрашувда майдонга тушди. “Рома” сафига куни кеча қўшилган Андреа Белотти ҳам “Монца”га қарши баҳсда дебютини нишонлади.
Элдор Шомуродов эса Моуриньо фойдаланмаган ягона ҳужумчи бўлиб турибди. Агар форвардимиз пойтахтни тезроқ тарк этмаса, мавсум давомида ўйин амалиётисиз қолиб кетиши ҳеч гап эмас. Португалиялик мутахассис фаолияти давомида аввалги жамоаларида бир неча ўйинчиларни захирада олиб ўтириб, “синдиргани” кўп кузатилган.
Шомуродовнинг ўйин амалиётисиз қолиб кетиши биринчи навбатда, Ўзбекистон миллий терма жамоаси зарарига ишлайди.
Қувонарли томони шундаки, “кўҳна қитъа”да трансферлар ойнаси ёпилиш арафасида ҳам Элдор Шомуродовга харидорлар етарли.
Италиялик таниқли инсайдер Жанлука ди Марционинг ўз сайти орқали тарқатган хабарига кўра, “Болонья” ўзбекистонлик форвардни олиш фикридан қайтмаган ва бу трансферни амалга оширишга уринишини давом эттирмоқда.
Шунингдек, Андреа Белотти билан хайрлашган “Торино” ҳам ҳужум чизиғини Элдор Шомуродов ёрдамида кучайтиришга қарор қилган. Туринликлар сафида тўртта ҳужумчи бор ва бу узун мавсумга камлик қилади. Қолаверса, жамоанинг бир неча позицияда ўйнай оладиган ҳужумчига эҳтиёжи катта.
Бир пайтлар “Милан”ни дунёнинг энг қудратли клубига айлантирган Силвио Берлускони ҳозир “Монца” клубига эгалик қилмоқда. У ўз жамоасини А Серияга олиб чиқди. “Монца”нинг бу мавсумга асосий мақсади юқори дивизиондаги жойини сақлаб қолиш.
“Монца”да ҳам гол уришга қодир футболчига эҳтиёж катта. Дебтант жамоа А Сериянинг тўртта учрашувида атиги бир жуфт тўп киритди. Бу каби паст самарадорлик жамоага мақсадига эришиш имконини бермайди.
Берлускони қўл остидаги мутасаддилари ҳам трансфер ойнаси якунланишига қадар Элдор Шомуродовни ўз жамоасига олиб келишга ҳаракат қилиб кўради.
Аслида Элдорга Англия, Германия, Россия, Туркия, Саудия Арабистони каби мамлакатлар жамоаларидан қизиқиш борлиги хабар қилинган эди. Айниқса, Туркиянинг энг машҳур жамоалари – “Галатасарой”, “Бешиктош” ва “Трабзонспор” римликлар билан ўзбек футболчиси бўйича музокара ўтказишгача етиб борди. Лекин Элдор Шомуродовнинг Италияда қолмоқчи бўлган бу трансферларга тўсқинлик қилди.
Демак, ҳамюртимиз олдида иккита йўл турибди. Бир кун ичида ўзига қизиқиш билдираётган Италия клубларидан бирига розилик бериш ёки Жозе Моуриньодек қайсар мураббийнинг ўзига имкон беришини кутиб ўтириш қолди.
Элдор Шомуродов “Машъал”, “Бунёдкор”, “Ростов”, “Женоа” ва “Рома” жамоалари сафида жами 221 та учрашувда майдонга тушиб, рақиблар дарвозасини 45 маротаба ишғол қилган ва жамоадошларига 23 та голли узатма оширган.
Шунингдек, Ўзбекистон миллий терма жамоаси сафида жами 53 та беллашувда қатнашиб, ўз ҳисобига 30 та гол ёздириб қўйган.