“Сити” юлдузининг нархини айтди

“Манчестер Сити” раҳбарияти “Барселона” қизиқаётган ярим ҳимоячи Ферран Торреснинг трансфер суммасини маълум қилди. Испаниялик футболчини қишда сотиб олмоқчи бўлган жамоалар, хусусан, “Барселона” ғазначилари 60 миллион евро тайёрлаб қўйиши керак бўлади.

Манбаларнинг хабар беришича, Каталония клуби бу суммани тўлашга қодир эмас. Улар “шаҳарликлар”ни Испания терма жамоаси вакилини 45 миллион еврога қўйиб юборишга кўндирмоқчи.

21 ёшли ярим ҳимоячининг ўзи “Барселона”да ўйнаш учун маошининг пасайтирилишига ҳам розилик берди.

Торрес Хосеп Гвардиола жамоасида асосий таркибга киришга қийналмоқда ва вақтини захирада ўтказмоқчи эмас. У жорий мавсумда барча турнирларда етти бор майдонга тушиб, учта гол ва битта ассистни амалга оширган бўлса-да, бу кўрсаткич унинг асосий таркибга киришига камлик қилмоқда.