“Сити” юлдузига ўринбосар излаяпти
- 8-феврал, 10:57
- Zohir Toshxo’jayev
- 0
- Футбол
“Манчестер Сити” раҳбарияти клуб билан амалдаги шартномаси якунланиб бораётган Бернарду Силванинг ўрнини босишга қодир бўлган янги ижрочи қидириш ишларини кучайтирди.
Португалиялик юлдуз 2017 йилда Франциянинг “Монако” клубидан кўчиб ўтганидан бери “шаҳарликлар” сафида ўйнамоқда ва бош мураббий Хосеп Гвардиола унга ўтган йили жамоа сардорлигини топширди.
Бернарду Силва “Сити” сафида шу вақтга қадар олти марта Премьер-лига чемпиони, икки марта Англия Кубоги соҳиби, тўрт марта Лига Кубоги ғолиби ва Европа Чемпионлар лигаси ғолиби бўлган.
Бироқ Силванинг шартномаси мавсум охирида тугайди ва The Athletic хабарига кўра, таркибни ёшартириш сиёсатини давом эттиришга қарор қилган “Манчестер Сити” 31 ёшли ўйинчи билан хайрлашишга тайёргарлик кўрмоқда.
Силванинг келажагига келсак, унга Саудия Арабистонида ҳали ҳам қизиқиш бор. Шунингдек, Европада ҳам вариантлар мавжуд. Масалан, “Барселона” тажрибали ўйинчини эркин агент мақомида бепул қўлга киритишни орзу қиляпти.