Шон Стрикленд- Дрикус Дю Плесси ким ғалаба қозонади? ММА олами вакилларидан ўзига хос фикрлар!

Эртага, 21 январь тонгида "UFC 297" турнири старт олади. Марказий жанг ўрта вазн тоифаси чемпионлиги учун Шон Стрикленд ва Дрикус Дю Плесси ўртасида кечади. Биз анъанага мувофиқ ушбу жанг ҳақида ММА олами вакилларини фикри билан қизиқдик.

Ҳилола Собирова - ММА жангчиси

- Биласизми, бу жанг ман учун жуда ҳам қизиқарли ва бу жангни интизорлик билан кутяпман. Мени фикримча Стрикленд ғолиб бўлса керак. Икки жангчини ҳам машғулот ва жангларини кузатдим. Стрикленд ҳарактери ва ақлли жанг олиб бориши билан Плессидан анча устун. Плесси ҳам яхши жангчи, у ҳам камарга лойиқ. Лекин бу баҳсда кучли ва ақилли ютади. Яқинда ижтимоий тармоқларда Стрикленднинг интервьюси тарқалди. У жуда ҳам қўпол тарзда гапирди. Бироқ уни гаплари хақиқат эди. Мен шу тамонлама ҳам уни жуда ҳурмат қиламан. Мен ҳам шундай UFC камарига жанг қилиб Ўзбекистонимизга камарни олиб келиш насиб қилсин ва ман бу учун ҳаракатдан тўхтамайман.

Шуҳратбек Абдумуталибов - мураббий

- Икки хил услуб жангчиларининг тўқнашуви бўлади. Стрикленд соф "стойка"да жанг олиб борса, Плессининг кураши яхши. Менимча бу жангда Стрикленд уни тута олса керак. Назаримда Стрикленд нокаут билан ғалаба қозонади.

Баҳромжон Рўзиев - ММА жангчиси

- Иккиси ҳам яхши савиядаги жангчилар ҳисобланади. Бироқ имкониятларга тўхталадиган бўлсак, Стрикленд ушбу жангда ғалаба қозонса керак. Чунки, унда чидамлилик жуда юқори, деб ўйлайман. Стрикленд ғалабани илиб кетади ва камарини ҳимоя қилади.

Мавлонбек Мавлонов - мураббий

- Бу жангда Стрикленд ғалаба қозонади. У чемпионликни хис қилган ва чемпионлик жангини ҳам ўтказди. Рақибига нисбатан кучли жангчилар билан кўп тўқнаш келган. Унда чемпионлик ҳарактери бор. Назаримда бу жанг Стриклендни ғалабаси билан тугайди.

Марат Бекмуратов - менежер (Қирғизистон)

- Қизиқарли жанг бўлади. Тўғриси, бу баҳсда Дю Плесси ғалаба қозонади. Стрикленд шоумен ва шунчаки кутилмаганда чемпион бўлиб қолди. Дю Плесси бошқа даражадаги жангчи. У ғалаба қозонади.