Шомуродовнинг сўнгги сониядаги голи Римдаги энг ёрқин воқеа бўлди

“Рома”нинг аргентиналик футболчиси Матиас Суле idealista.it портали журналисти Флавио Ди Стефанога берган интервьюсида Римдаги ҳаёти ва муҳим воқеалар ҳақида маълумот берди. Суҳбат чоғида Суле жамоадош Элдор Шомуродовнинг Европа лигаси доирасида урган голи унда унутилмас таассурот қолдирганини алоҳида тилга олди.

Sports.uz портали ушбу суҳбатни ўзбекистонлик футбол ишқибозлари эътиборига ҳавола этади.

- Ўтган ёз Римга келганингизда сизни хурсандчилик билан кутиб олишди. Бунақасини кутганмидингиз?

- Бу даражада бўлишини кутмаган эдим, шу боис, ҳайратга тушдим. Мен ҳақиқатан ҳам айнан мана шу клубга келишни орзу қилардим.

- Сиз футбол ўзгача иштиёқ билан қадрланадиган Аргентинадан келгансиз. “Рома” фанатлари ва  юртингиздаги мухлисларда ўхшашлик борми?

- Фарқ катта эмас. Улар футболни жўшқин иштиёқ билан кузатиб боришда ўзаро ўхшаш. “Ривер Плейт” ва “Бока Хуниорс” ишқибозларида ўзига хослик бор ва бу айрим жиҳатлардан “Рома” мухлисларини эслатиб юборади.

- “Рома” ўйинчиси бўлганингиздан бери энг ёрқин таассурот нима бўлди?

- Элдор Шомуродовнинг “Атлетик Бильбао” дарвозасига охирги сонияда урган голи. Байроқлар, ажойиб кўриниш, мухлислар билан тўлган учрашувда бу голдан кейин ғалаба қозониш унутилмас онларни тақдим этди ва жуда ёқди. Фаолиятим давомида бунақасини ҳали кўрмаган эдим. Биз ўйнайдиган “Олимпико” доимо мухлисларга тўла.

- Леандро Паредес ва Пауло Дибала билан муносабатларингизга таъриф бера оласизми?

- Ҳар иккиси билан алоқам ажойиб даражада. Бир биримизни “Рома”га келишимдан аввал ҳам билардик. Тригорияда бирга кўп вақт ўтказяпмиз. Ҳатто, майдондан ташқарида ҳам кўпинча биргамиз.

- Жамоа аъзолари орасида бирортаси билан яшаш керак бўлса, кимни танлардингиз?

- Ўзаро муносабатларимиз аъло даражада эканини  инобатга олиб, Пауло Дибалани танларжим. Паредес билан яшаш ҳам яхши вариант.

- Римда сизга кўпроқ нима ёқади? Ёқтирган жойингиз борми?

- Рим ажойиб шаҳар. “Фрозиноне”да ўйнаган давримда бу ерга келгандим. Ўзим учун жуда кўп нарса кашф қилдим. Кўпроқ шаҳар ресторанларида овқатланиш учун чиқаман. Агар ота-онам ва қариндошларим мени кўргани келишса, асосан шаҳар маркази ва тарихий жойларга саёҳат қиламиз.

- Орзудаги уй қандай бўлиши керак?

- Мен учун кенглик муҳим, боғ, гўшт пишириш учун жой ва албатта, футбол дарвозаси бўлиши шарт. Дўстларим зиёратга келиб турса бўлди.

- Кўпинча, уйдаги машғулотлар суратини эълон қиласиз. Спорт залдан ташқари совринлар ва эсдалик совғалари учун ажратилган жой борми?

- Ҳозирча, бунақа махсус жой йўқ. Лекин келажакда футбол учун алоҳида хона ажратаман. У ерда маур футболчиларнинг либослари бўлади. Ҳозирнинг ўзида Мессининг ПСЖдаги формаси, Анхель Ди Мария футболкаси, Лаутаро Мартинеснинг футболкаси бор. Мен уни “Интер” билан ўйинда алмаштириб олдим. Ҳали жуда кўп футболка йиғаман.

Эслатиб ўтамиз, Матиас Суле “Ювентус” тарбияланувчиси ҳисобланади. Орада бир муддат ижара асосида "Фрози“оне" шарафини ҳам қилган. Ўтган ёз “Рома” уни 25,6 миллион еврога трансфер қилди.

Аргентиналик футболчи “Рома” футболчилари орасида майдонда айниқса, ўзбек легионери Элдор Шомуродов билан бир бирини жуда яхши тушуниб ҳаракат қилади.

Файзуллаевнинг устози шогирди қайси лигага боришини айтди

Экспертлар ўйини қовушмаган Ҳусановни қандай баҳолади?

ЦСКА ва Файзуллаев Европадан бўлаётган қизиқишга қандай жавоб берди?