Шомуродов учун 10 миллион евро санайдиган иккинчи клуб чиқди

“Рома” қишки трансферлар вақтида Элдор Шомуродовни қўйиб юборишга тайёрлиги ҳақида хабарлар тарқала бошлади.

Рим клуби ўзбек ҳужумчиси учун бадал пули пули миқдорини пасайтириб, уни 10 миллион евро миқдорида белгилаганидан кейин А Серия клубларидан аниқ таклифлар кела бошлади.

Биринчилардан бўлиб, “Торино” Элдор Шомуродов учун катта харажат қилишга тайёрлигини билдирди. Туринликлар легионеримизни аввал ижарага олиб, мавсум давомидаги натижалари ва кўрсаткичлари таҳлили асосида римликларга улар талаб қилаётган суммани ўтказиб бериш вариантини таклиф қилмоқда.

Il Messaggero нашрининг таъкидлашича, яна бир клуб – “Кремонезе” ҳужум чизиғига Шомуродовни олиб келишга бел боғлаган. Аслида кремонеликлар анчадан бери Элдорга қизиқиш билдириб келаётган эди.

Ўзбекистон миллий терма жамоаси етакчиси яқинда аутсайдер жамоанинг чорловини қабул қилмаганди. “Кремонезе” кейинроқ, Шомуродовдан умидини узиб, “Верона” ҳужумчилари - Томас Анри ва Кевин Лазаньядан бирини олиб келишга қарор қилгани маълум қилинди.

Бироқ, “Кремонезе” раҳбарияти “Рома” Шомуродовга аниқ нарх қўйганидан кейин режасини амалга ошириб кўриш учун яна бир бор ҳаракат қиладиган бўлди.

Демак, қишки трансферлар ойнаси очилишига бир неча кун қолган паллада “Торино” ва “Кремонезе” пойтахт клуби ўзбек форварди учун талаб қилаётган нархни тўлашга қарши эмас. Бу рўйхат яна кенгайиши кутилмоқда. Чунки бу икки клубдан ташқари “Монца”, “Сампдория”, “Специя”, “Сассуоло” ва “Фиорентина” ҳам ҳужум чизиғини кучайтириш учун Элдорни кузатиб бораётгани хабар қилинган.

“Рома” Элдор Шомуродовни 2021 йилнинг ёзида “Женоа”дан 18 миллион еврога трансфер қилган эди. Соҳа мутахассислар ўзбек футболчиси “бўрилар”га қимматга тушганини, клуб ўша пайтда жамоани қабул қилиб олган Жозе Моуриньонинг талабини амалга ошириш учун шошилиб қарор қилганини таъкидлаб келади.

Шунга қарамай, португалиялик мураббий бир ярим мавсум давомида бир неча позицияда ўйнай оладиган ҳужумчига етарли имконият бермади. Статистикада Элдор римликлар сафида 48 та учрашувда олтитадан гол ва ассист қайд этгани кўрсатилган. Лекин бу ўйинларнинг аксариятида ҳамюртимиз бир неча дақиқадан ўйнаган холос.

Элдор Ўзбекистон миллий терма жамоаси таркибидаги ўйинларда доим юқори спорт формасида эканини намойиш қилиб келган. Хусусан, якунланаётган йилда терма жамоа учун ўнта учрашувда қатнашиб, рақиблар дарвозасини ўн бир маротаба ишғол қилди.

Демак, 27 ёшли ҳужумчимизнинг фаолиятида янги давр бошланишининг эҳтимоли жуда катта. Январда Элдор ўзига мунтазам ўйин амалиёти берадиган клублардан бирини танлашига умид қилиб қоламиз. Зеро, у айнан ўйнайдиган ёшда ва захирада ўтиравериш Ўзбекистон миллий терма жамоаси сардорига тўғри келадиган иш эмас.

Машҳур клуб Шомуродовни олишга тайёр, фақат бир шарти бор!

Бу клубга Шомуродов армон бўлиб қолди!

Шомуродов “махсус” терма жамоага тушди!

Шомуродов олдида яна бир янги вариант пайдо бўлди!

Шомуродовга қайси жамоага ўтишни айтишди!

Ўзбек тўпурарини Польшада кутишяпти!