Шомуродов Роналду ва Серхио Рамос қаторига қўшилди!
- 21-январ 2022, 07:20
- Zohir Toshxo’jayev
- 2
- Футбол
Хориж матбуоти Жозе Моуриньо хатти-ҳаракатларини таҳлил ва танқид қилишни яхши кўради. Яқинда португалиялик мутахассис “Ювентус”дан учралган аламли мағлубиятда Элдор Шомуродовни айблаганидан сўнг, чет эллик журналистлар Моуриньо фаолиятига назар солиб, бу мутахассис танқидига ва ғазабига дучор бўлган футболчилар ва уларга нисбатан айтилган аччиқ гапларни мухлисларга эслатиб ўтди.
Ҳозирги пайтда Жозе Моуриньонинг ўзини муваффақиятли мураббийлар сафига қўшмай қўйишди. У анчадан бери нуфузли турнирларда ютмай қўйган. Охирги совринлар – Англия футбол лигаси кубоги ва Европа лигаси бош совринини 2017 йили “Манчестер Юнайтед”да ишлаган вақтда қўлга киритган.
Мутахассислар португалиялик мутахассис кейинги пайтда мағлубиятлар учун айбни футболчиларга ағдараётгани ва шогирдларини омма олдида танқид қилаётганига алоҳида эътибор қаратди. Ҳозирча, Моуриньо танқидига учраган охирги футболчи Шомуродов бўлиб турибди. Бу борада ҳамюртимиз Криштиану Роналду ва Серхио Рамос қаторига қўшилди. Моуриньо Мадридда ишлаган пайтда “Реал”нинг бу икки етакчиси билан бир неча бор тўқнашгани ҳақида маълумотлар келтириляпти. Ҳатто, “Қироллик клуби”нинг машҳур дарвозабони Икер Касильяс айнан Жозе туфайли қадрдон клубини тарк этишга мадбур бўлган экан.
Sports.uz портали Моуриньонинг ўз шогирдларини қай тарзда омма олдида танқид қилганини эътиборингизга ҳавола этади:
Пепе
Пепенинг ягона муаммоси – Варан. 31 ёшли ўйинчи ўзини 19 яшар ўсмир захирага михлаб қўйганини ҳазм қилиш қийин. Лекин ҳаёт қонуни шундай.
Рикарду Карвалью
Карвальюнинг нарсаларни англаш борасида муаммо бор. У ақлий тестдан ўтиши ёки жиннихонага бориши керак.
Эден Азар
Эденга ўхшаганларнинг изоҳи бу нормал ҳолат. Чунки у жамоа учун ўзини қурбон қиладиган ўйинчи эмас. Азар етарлича маънавий тайёргарликка эга эмас.
Поль Погба
Сен ўйнамаяпсан, футболчи ва мухлисларни ҳурмат қилмайсан. Атрофидаги яхши ва адолатли одамларнинг менталитетини ўлдиряпсан. Сен ёпиқ хонада грипп бўлган одам кабисан – вирусингни бошқаларга юқтиряпсан.
Танги Ндомбеле
Айримлар ҳозир қанақа лигада ўйнаётганини тушиниб кетгани йўқ. Жамоанинг зарарига бу ўйинчига бошқа имкон бера олмаслигимни унинг ўзи англаб етиши керак.
Люк Шоу
Шоу кўз олдимда ўйнади ва у учун фақат мен қарор қабул қилдим. Бизга унинг жисмоний ва техник устунликлари керак, лекин у ҳар жоим менинг ақлим билан ўйнай олмайди.
Генрих Мхитарян
У мавсумни зўр бошлади. Кейин сочилиб кетди. Ўйини пастлаб бормоқда. Етарли, бошқа футболчилар ўз имкониятига эга бўлиш учун қўшимча ишламоқда.
Элдор Шомуродов
70 дақиқа давомида ўйинни тўлиқ назорат қилдик. Жамоа жуда зўр ўйнади. Бироқ 70-дақиқадан сўнг психологик носозлик рўй берди. Афена-Гьян ажойиб ўйин ўтказди, лекин уни алмаштирган футболчи (Элдор Шомуродов) ҳаммасини нотўғри қилди. У майдонга тушган илк дақиқадан хато қила бошлади. Рақиб ҳисобни 3:2 га қисқартирганида биз тамом бўлдик.
Таъкидлаш жоизки, Моуриньонинг аччиқ гапларига нишон бўлганлар аксарияти ўз даврининг машҳур ўйинчилари ва улар жаҳон футболида ўз сўзини айта олган футболчилардир. Шу маънода, Элдор Шомуродов ҳам самарали ўйинлари билан Жозенинг танқидига муносиб жавоб қайтара олишига умид қиламиз.