Шомуродов жамоаси “Реал” тарбиялаган футболчини олди
- 3-сентябр 2024, 21:31
- Zohir Toshxo’jayev
- 0
- Футбол
“Рома” ҳимояни чизиғини янглаш ва кучайтириш сиёсатини олиб бормоқда. Ана шу мақсадда раҳбарият испан ҳимоячиси Марио Эрмосони олиб келди.
Трансфер бўйича Рим клуби расмий ахборот чиқарди.
Эрмосо “Реал” тарбияланувчиси ҳисобланади. Бироқ “Қироллик клуби”нинг асосий таркибидан жой тегмагани учун фаолиятини бошқа клубларда давом эттирган.
29 ёшли футболчи Испанияда “Реал Вальядолид”, “Эспаньол” ва “Атлетико” шарафини ҳимоя қилган. Диего Симеоне қўл остида беш йил ўйнаган Эрмосо “Рома”га эркин агент мақомида қўшилди ва уч йиллик шартнома имзолади.
Пойтахт клуби тажрибали ўйинчининг йиллик маошини 3,5 миллион евро қилиб белгилади ва турли бонуслар ҳам ажратилади.
“Рома” ёзги трансферлар вақтида жами 11 нафар янги ўйинчини ўз таркибига қўшиб олди. Марио Эрмосо Римга олиб келинган охирги футболчи бўлди.
Бундан ташқари, 22 рақамни танлаган Эрмосо “Рома”да ўйнаган 18-испаниялик чарм тўп устаси сифатида тарихга кирди.