Шомуродов гол урса бўлди!
- 6-март 2025, 06:02
- Zohir Toshxo’jayev
- 1
- Футбол
Тажрибали мутахассис Клаудио Раньери “Рома” бош мураббийи этиб тайинланганидан кейин жамоа ўйинида жиддий ижобий ўзгаришлар рўй берди.
Римликлар А Серия мусобақа жадвалининг қуйи поғоналарини тарк этиб, ҳозирча кучли саккизликка кирди ва кўтарилишни давом эттиришни мақсад қилган. “Бўрилар” келаси мавсум учун Европа кубокларига йўлланма берадиган дастлабки олтиликка кириш учун курашмоқда.
Шунингдек, Раньери пойтахт клубини Европа Лигасининг умумий босқичидан муваффақиятли олиб ўтди. Плей-оффнинг ўтиш учрашувларида “Порту”ни мусобақадан чиқариб юборди. Шу тариқа, “Рома” бош соврин учун даъвогарга айланди.
Бу йўлда Элдор Шомуродов жамоаси энди кучли рақиб – Бильбаонинг “Атлетик” клуби қаршилигини икки учрашувда енгиб ўтиши талаб этилади.
Бу жамоалар умумий босқичнинг биринчи турида ўзаро тўқнаш келган ва Римдаги учрашувда кучлар тенг келган эди. Бироқ ўша “Рома”ни ҳозиргиси билан солиштириб бўлмайди. Римликлар 2025 йилда ҳали мағлуб бўлгани йўқ. Мағлубиятсиз серия 11 та учрашувга етди. Шундан саккизтасида жамоа ғалаба қозонди.
Мутахассислар жамоани Клаудио Раньери қабул қилиб олганидан кейин Элдор Шомуродов, Матиас Суле, Анжелиньо, Матс Хуммельс, Зеки Челик каби иккинчи планга ўтиб қолган футболчилар ўйини сезиларли даражада ўзгариш бўлгани ва улар асосий таркибдан жой ола бошлаганини алоҳида таъкидламоқда.
Айниқса, январда жамоадан кетиши кутилган Элдор Шомуродовнинг февраль ойида “Рома”нинг энг яхши ўйинчиси, деб эътироф этилган легионеримизнинг жамоадаги қадри ва аҳамияти кўтарилаётганидан далолат беради.
Бугунги кунда Элдор Шомуродов “Рома”нинг асосий ҳужумчиси ва тўпурари Артём Довбикнинг ўринбосаридан унинг рақобатчисига айланди. А Серия ва Европа лигасининг аввалги босқичларида ўзбек футболчисининг самарали ўйини жамоасининг ғалабаларига асос бўлгани ҳам бор гап.
Энди “Атлетик” билан бўладиган тўқнашув олдидан Клаудио Раньерида ҳужумчилар бўйича танлаш ва керак бўлганда ротация қилиш имконияти бор.
“Рома” футболчиси Анжелиньо ҳам учрашув олди матбуот анжуманида ўзбекистонлик ва украиналик форвардларни ўзаро таққослади.
- Майдонда Артём Довбик билан ўйнайманми ёки Элдор Шомуродов ўйинга тушадими, бу менинг ўйин услубимни ўзгартиришимга сабаб бўлмайди. Уларнинг ҳар иккиси буюк футболчилар.
Ҳақиқат шуки, менга уларнинг иккаласи билан ўйнаш ёқади. Уларга гол уришлари учун тўпни имкон қадар қулай етказиб беришга ҳаракат қиламан.
Ҳужумчиларимизни дарвозани ишғол қилиш имконини берадиган узатмалар билан таъминлаш учун маҳоратимни янада такомиллаштириб боришим лозим бўлади. Аслида умумий жиҳатдан ўйинимни кучайтиришим керак, - деди Анжелиньо.
“Рома”футболчилари “Атлетико”га қарши бўладиган Европа лигасининг нимчорак финал босқичидаги биринчи учрашувини 6 мартдан 7 мартга ўтар кечаси, Тошкент вақти билан соат 01:00 да “Олимпико” стадионида ўтказади.
Бу жамоалар ўртасидаги жавоб ўйини 13 март куни Испаниянинг Бильбао шаҳрида ташкил этилади.
“Файзуллаевни қийнаган бош мураббий ҳали ишдан олинади!”