Шомуродов гол урган гранд клуб “Барса”дан машҳур дарвозабонни оладиган бўлди
- 16-декабр 2025, 07:15
- Zohir Toshxo’jayev
- 0
- Футбол
Испаниянинг амалдаги чемпиони “Барселона” қишки трансферлар даврида германиялик голкипер Марк-Андре тер Штегенни бошқа клубга ўтказиш имкониятидан фойдаланиб қолмоқчи.
Ўн йилдан бери жамоа дарвозасини муносиб қўриқлаб келган 33 ёшли голкипер ўтган мавсумда бош мураббий Ханс-Дитер Фликнинг ишончини йўқотди. Ҳозир Каталония суперклуби биринчи рақамни ёзда олинган Жоан Гарсияга топширган.
Тажрибали Войцех Шчесни эса захира дарвозабони вазифасини бажаряпти ва имкон бўлди дегунча дарвозани муносиб қўриқлаб келяпти.
Тер Штеген оғир жароҳатдан яқинда қутилди, бироқ унинг асосий жамоага кириш учун йўллари ёпилган. 2026 йилги жаҳон чемпионатида қатнашиш учун эса, у мунтазам ўйин амалиётига эга бўлиши керак.
Марк-Андре тер Штеген атрофида юзага келган вазиятдан Туркиянинг машҳур клубларидан ҳисобланган “Бешиктош” фойдаланиб қолмоқчи.
Бу ҳақда инсайдер Экрем Конур X ижтимоий тармоғидаги саҳифасида маълум қилди.
Манбага кўра, туркияликлар тажрибали голкиперни январда ижарага олиш бўйича “Барселона”га расмий таклиф юборди.
Бироқ сўнгги хабарларга қараганда, тер Штеген фаолиятини “топ-5” лигаларда давом эттирмоқчи ва даражасини Испания Ла Лигасидан пастроқ бўлган чемпионатларга бормоқчи эмас.
Биз учун эътиборли жиҳати шундаки, Ўзбекистон миллий терма жамоаси сардори ЭлДор Шомуродов “Рома”дан “Истанбул Башакшеҳир”га ижара асосида кўчиб ўтганидан кейин Туркия Суперлигасидаги дебют голини айнан “Бешиктош” дарвозабони Мерт Гюнок дарвозасига урган эди.
Бугунги кунда 30 ёшли легионеримиз Туркия чемпионатининг ўнта жамоасига гол уришга улгурди. Элдор айни пайтда 11 та гол ва иккита ассист билан Суперлиганинг энг самарали ўйинчиси бўлиб турибди.
Марк-Андре тер Штеген эса, 2014 йилнинг ёзидан буён “Барселона” сафида тўп суриб келмоқда. Унинг каталониялик гранд билан амалдаги меҳнат шартномаси 2028 йилнинг ёзигача мўлжалланган. Transfermarkt портали немис дарвозабонининг трансфер қийматини 7 миллион евро деб баҳоламоқда.