Шайх Салмон ОФК Президенти сифатида қайта сайланди

Унга кўра, ташкилотнинг амалдаги раҳбари Шайх Салмон бин Иброҳим Ал-Ҳалифа яна 4 йил муддатга ОФК президенти этиб сайланди.

 

Қайд этиш жоиз, ОФК президентлигига номзодлар орасида фақатгина ташкилотнинг амалдаги раҳбари Шайх Салмон бин Иброҳим Ал-Халифа номзоди қолган эди. Даставвал бу лавозимга даъвогарлар сони 3 нафар эди: Шайх Салмон Иброҳим бин Халифа (Баҳрайн), Сауд Ал Моҳаннади (Қатар) ҳамда Муҳаммад Ал Ромаити (БАА).

 

Март ойида дастлаб Муҳаммад Ал Ромаити, кейинчалик Сауд Ал Моҳаннади сайловда иштирок этмаслигини маълум қилиб, ўз номзодини қайтиб олган эди. Шу тариқа номзодлар орасида фақатгина Шайх Салмон бин Иброҳим Ал-Халифа қолган холос. Эслатиб ўтамиз, ОФК президенти бир вақтнинг ўзида ФИФА вице-президенти ҳам саналади.

 

Таъкидлаш жоиз, ўтган ой Қирғизистоннинг Бишкек шаҳрида ўтказилган Марказий Осиё футбол ассоциацияси (МОФА) Конгрессида ташкилотга аъзо барча мамлакат вакиллари (Афғонистон, Эрон, Қирғизистон, Тожикистон, Туркманистон ва Ўзбекистон) бўлажак сайловда Шайх Салмон бин Иброҳим Ал-Халифа номзодини бир овоздан қўллаб-қувватлашини маълум қилишган эди.