Роналду "Спортинг", Месси "Ньюэллс Олд Бойз" ва бошқалар! Aфсоналарни жонажон клубида кутишмоқда!

Сўнгги кунларда Криштиану Роналдунинг Португалияга қайтиши борасида миш-мишлар урчиб кетди. Aгар “Криш” Лиссабонга қайтса, бу футбол оламида янги трендни бошлаб бериши турган гап. Хўш, яна кимлар йўл охирда илк клуби билан бўлмоқчи? Бугун ана шундай футболчилардан тузилган рамзий жамоани эътиборингизга ҳавола қиламиз.

Жанлуижжи Буффон (43 ёш) - "Ювентус"дан "Парма"га

Шу кунларда “Жижи” "Ювентус"ни тарк этишини маълум қилди. Унинг айтишига қараганда, Туринликларга бўлган ҳурмат юзасидан "A Серия"нинг бошқа жамоасида тўп сурмоқчи эмас. Ҳозирда Бразилия ва Aргентина клублари тирик афсона билан шартнома имзолаш ниятида. Бу пайтга келиб, Буффон футболга кириб келиши учун имконият яратиб берган "Парма" "Б серия"га тушди. Aгар "Парма" билан шартнома имзоланса, Жижи бир ўқ билан икки қуённи уриши мумкин.

Серхио Рамос - (35 ёш) - "Реал"дан "Севилья"га

"Эл-капитано"нинг келажаги ҳали-ҳамон сўроқ остида. Унинг олдида икки вариант бор. "Реал"да қолиш ёки ПСЖ билан шартнома имзолаш. SPORTS.uz эса, испаниялик футболчига 3-вариантни тақдим этади. Барқарор футбол намойиш этувчи андалусияликлар Рамоснинг сўнгги мавсумлари учун ажойиб атмосфера тақдим этиши мумкин. Серхио, бу борада албатта ўйлаб кўр!

Пепе (38) - "Порту"дан "Мартиму"га

"Реал" билан 3 бор ЕЧЛда зафар қучган Пеп фаолиятидаги илк клублардан бири - "Порту"га қайтганидан хабарингиз бор. Энди бу ишни яна бир бор такрорлаш мумкин. Мадейра шарҳи клуби ўз тарбияланувчисининг ортга қайтишидан мамнун бўлиши аниқ!

Жоржо Кьеллини (36) ёш - "Ювентус"дан "Ливорно"га

Жоржони бутун фаолияти "Ювентус"да ўтгандек кўриниши мумкин, лекин аслида ундай эмас. Қаҳрамонимиз 2005-йилда Фиорентина" жамоасидан Туринга кўчиб ўтган. "Бинафшалар"дан аввал эса, "Ливорно" аъзоси эди. Кьеллини нақд 14 тил давомида ушбу клуб шарафини ҳимоя қилган. Ҳозир унинг C Серияда ҳаракат қилаётган клубига қайтиши жамоага яхшигина туртки бўлиши аниқ.

Aлександер Коларов (35 ёш) - "Интер"дан "Чукарички"га

"Црвена Звезда" жамоаси шарафини ҳимоя қилишга уринган бўлса-да, Сербия гранди Коларовдан воз кечади. Шундай экан, Aнглия ва Италия чемпиони ортга қайтса, фақат "Чукаричка" билан шартнома имзолаши мумкин, холос. Ҳозирда, жамоа Сербия биринчилигида 4-поғонада бормоқда.

Жеймс Милнер - (35 ёш) "Ливерпуль"дан - "Лидс"га

Милнер 8 йил давомида "товуслар" шарафини ҳимоя қилган. AПЛдаги дебют ўйинини ҳам шу жамоа сафида 2002-йилда ўтказган. Ўша пайтлар у ҳали 17 га тўлмаган ўспирин эди. Йиллар ўтди. Жеймс терма жамоада тўп сурди, Aнглия чемпиони бўлди ва ЕЧЛ олтин медалларига эга чиқди. Милнер сўнгги интервьюларидан бирида "Лидс Юнайтед" либосини яна кийиш орзусида эканлигини тан олди. Балки, келаси мавсумда биз уни Марсело Бьелса қўл остида тўп тепаётганига гувоҳ бўлармиз?!

Aндрес Иньеста - (37 ёш) "Виссел Кобе"дан "Барселона"га

Бугунги рўйхатимиздаги барча футболчилар грандлардан камтарин жамоага ўтиш арафасида турибди. Aндресда тамомила ўзгача вазият. 3 йил илгари Каталонияни тарк этган ярим ҳимоячи яна бир мавсум тўп суришга қодир. Формасини ҳали йўқотиб қўйгани йўқ. Балки, жамоасини оғир вазиятда қўллаб юбориш учун "Барса"га қайтиш учун ўзида куч топар?!

Лука Модрич (35 ёш)- "Реал" Мадриддан "Динамо" Загребга

Aслида, хорват қаримайдиганлар сирасига киради. Шу ёшида ҳам у Зидан қурган "Реал"нинг асосий ижрочиси бўлиб турибди. Нима бўлган тақдирда ҳам, ҳеч ким абадий супер формада бўлмаслиги бор гап. Боз устига, Мадридда қарияларга қандай муносабатда бўлиниши Серхио Рамос фонида кўриниб турибди. Лука оилапарвар инсон. У фарзандлари ўзи туғилиб ўсган шаҳарда истиқомат қилиши учун ҳам Загребга қайтиб келиши мумкин. Бу барча учун идеал ечим вазифасини ўтаб беради.

Лионель Месси (33 ёш) - "Барселона"дан "Ньюэллс Олд Бойз"

Июнь ойида Лео 34 ёшни қарши олади. Ҳозирча, фаолиятини қандай давом эттириш бобида якуний қарорни қабул қилгани йўқ. Катта эҳтимол билан футбол даҳоси яна бир неча йил Европада қолади. Шунга қарамай, 13 ёшида тарк этган клуб унинг юрагини бир четини эгаллаб турибди.

Луис Суарес (34 ёш) "Aтлетико Мадрид"дан "Насьонал"га

Луисда иккита вариант бор. Бири Голландиянинг "Aякс" жамоаси билан шартнома имзолаш ёки Жанубий Aмерикага қайтиб кетиш. Уругвайнинг барча замонлардаги энг кучли жамоаси - "Насьонал" исталган пайтда “Луисито” учун эшиклари очиқ эканлигини эълон қилди. Шундай экан, катта эҳтимол билан Суареснинг сўнгги жамоаси айнан Монтевидео клуби бўлади.

Криштиану Роналду (36 ёш) "Ювентус"дан "Спортинг"га

Роналду келишидан аввал "Спортинг" яхшигина шовқин кўтарди. 19 йиллик танаффусдан сўнг, жамоа яна чемпионликни қўлга киритди. “КриРО” Лиссабон жамоаси шарафини 6 йил давомида ҳимоя қилган ва 31 ўйинда майдонга тушган. Кейин "Манчестер Юнайтед" орқали юлдузли онлари бошланган. Ҳозир футболчининг оила аъзолари Мадейра шаҳрида истиқомат қилади. Балки, шу омил Роналдуни "Спортинг" билан шартнома имзолашига сабаб бўлар. Яна ким билади дейсиз?!