Роналду: "Ҳеч қачон терма жамоага қўнғироқларни қабул қилишни тўхтатмайман!"

Португалия терма жамоаси ҳужумчиси Криштиану Роналду терма жамоадаги ўйинлари ҳақидаги саволга жавоб берди. Юлдузли футболчи терма жамоадаги фаолиятини якунлашни режалаштирмаганини айтди.

“Федерация президенти ва мураббий ҳали ҳам мени фойдали бўлишимга ишонар экан, терма жамоада қоламан. Ҳеч қачон терма жамоага қўнғироқларни қабул қилишни тўхтатмайман, чунки бу менинг орзуим бўлган. Терма жамоада ўйнаш - кареранинг чўққиси. Мен ўйнашда давом этиб, оилам, дўстларим ва барча португалияликларни хурсанд қилишни хоҳлайман.

Жамоага бундан ҳам кўпроқ нарсани бера оламанми? Шубҳасиз, мен шунинг учун бу ердаман. Ўйлайманки, мен ҳали ҳам яхши ишлаяпман – голлар урмоқдаман ва яхши ўйнаяпман. Мотивациям бор экан, терма жамоадаги борлигим ҳаммага ёқса, етакчилигим ҳаммага ёқса, мен ҳеч қачон терма жамоадан воз кечмайман. Умид қиламанки, бу йўл ҳали тугамайди”, — деди Роналду журналистларга.