Роналду футболдан четлатилиниши мумкин. “Ювентус”нинг “конверт операцияси" ошкор бўлиб бормоқда!

“Ювентус” ҳозир оғир кунларни бошдан ўтказмоқда. Молиявий фэйр-плей қоидаларини айланиб ўтгани боис, клуб 15 очкосиз қолганидан хабарингиз бор. Эндиликда, италиялик журналистлар бирин-кетин оммага қимматли информацияларни сиздирмоқда. Агар бу фактлар исботини топса, “Ювентус” 2006 йилдагидан ҳам оғирроқ аҳволга тушиб қолиши аниқ.

Андре Аньелли ва унинг менежерлари футболчиларнинг маошини яшириш, сарф-харажатларни кичрайтириб ёзиш орқали солиқларни айланиб ўтишда гумонланмоқда. Қўшимчасига, “Юве” пандемия чоғида яширин комбинацияни амалга оширган. Клуб футболчилар ўз маошларининг қисқаришига рози бўлганинини расман эълон қилиб, бу суммани солиқларсиз конвертларда эгасига топширган. Сўнгги маълумотларга қараганда, бу пуллар тўлиқ тўлаб ҳам берилмаган. Клуб Роналдунинг ўзидан 19,9 миллион евро маош қарз бўлиб қолган.

Натижада, клубда ишлаган барча менежерлар 2 ва 1 йил давомида Италия футболида ишлаш ҳуқуқидан маҳрум этилди. Ҳатто, Павел Недвед ҳам 1 йилу 4 ой муддатга ишсиз қолади. Бу воқеалар фонида журналист Паоло Зилиани томондан ошкор қилинган маълумотлар вазиятнинг янада кескинлашишига сабаб бўлди. Ҳужжатда клубнинг 22 футболчи билан “конверт операцияси”ни амалга оширгани ҳақидаги фактлар мавжуд. Рўйхатда, Роналду, Дибала, Буффон ва Бонуччи сингари номларни кўриш мумкин. Журналистнинг айтишича, Жоржо Кьеллини Аньеллининг бу операциясига футболчиларни рози бўлишга кўмаклашган.

Сўнгги маълумотларга кўра, тергов-суриштирув чоғида кўплаб инсонлар бу жиноятда иштирок этганини тан олди. Маттейс де Лихт эса, “WhatsApp” тармоғидаги Кьеллини билан ёзишмаларини терговчиларга тақдим этган. Унда “Юве” сардори конвертда маош олишни ёмон томони йўқ эканлиги ва бу ўртада сир бўлиб қолиши ҳақида айтилган сўзлари далил тариқасида ишлатилиниши тахмин қилинмоқда. Зилианнинг айтишича, агар бу айбловлар ўз исботини топса, молиявий фэйр-плейни айланиб ўтмоқчи бўлган футболчилар камида 1 ойга футболдан четлатилиниши керак. Бу “Ан-Наср” узоқ кутган футболчисидан яна бир ойга айрилиб қолиши мумкинлигидан далолат беради.

“Юве”га эса, солиқ тўламай берилган маошларнинг 3 баробари миқдорида жарима белгиланиши мумкин. Биргина Роналдунинг маоши 20 миллион эканлигини ҳисобга олсак, “зебралар”ни фантастик суммадаги жарима кутиб турганини ҳис қилиш мумкин. Бу ҳали ҳеч нарса эмас! Асосий зарба 2006 йилда бўлгани каби Б Серияга равона бўлиш. Шунингдек, сўнгги чемпионлик ҳам жамоадан тортиб олишини эҳтимоли бор.

Я . У