Роналду Антонини "Ан-Наср"га олиб келишни истаган эди

"Ан-Наср" ҳужумчиси ва сардори Криштиану Роналду вингер Антонини Саудия клубида кўришни истади. Журналист Маркос Бернатнинг Marcador дастурида маълум қилишича, бразилиялик ёзда "Ан-Наср"га ўтишга яқин турганди. Роналду Антонининг эҳтимолий трансферини ижобий баҳолаган.

"У "Ан-Наср" билан музокаралар олиб борди, футболчи таклифни тинглади ва Криштианунинг атрофида келишув деярли ҳал бўлган деб ҳисоблашди. Ўша пайтда Криштиану бу ғояни ижобий қабул қилди ва бу ҳақда футболчининг ўзига ҳам маълум қилишди", - дея Бернатнинг сўзларини келтиради Marca.

Натижада, "Ан-Наср" Кингсли Команни сотиб олишга эътибор қаратди. Ўз навбатида, Антони дастлаб "Бетис"га ўтишни хоҳлаган ва у ерда ярим йил ижара асосида ўйнаган. Испан клубини танлашнинг асосий сабаби - жаҳон чемпионатида ўйнаш истаги.

1 сентябр, душанба куни 25 ёшли вингер "Бетис"га ўтгани маълум бўлди.