“Рома” ҳужумчисини энг бадавлат клубга бермади

Саудиялик инвесторлар қўлига ўтганидан кейин энг бадавлат клублардан бирига айланган “Ньюкасл” Николо Дзаньолони сўраб, “Рома” раҳбариятига мурожаат қилди.

Англия клуби универсал футболчини 5 миллион евро эвазига ярим мавсумга ижарага бериш ва кейинчалик трансферни 35 миллион евро билан якунлаш ҳуқуқини сўраган. Ньюкаслликлар Дзаньоло Англия премьер-лигасига кўчиб ўтганидан кейин қолган учрашувларнинг 75 фоизида қатнаша олса, уни харид қилиш бандини активлаштиришни режа қилаётган эди.

“Ньюкасл”нинг бу таклифи спорт директори Тьягу Пинтони қониқтиргани йўқ ва у “қарғалар”га рад жавобини берди.

Дзаньоло “Рома”дан янги шартнома олмаганидан кейин пойтахтни тарк этишга қарор қилган. Унга Англия, Германия ва Италия клубларидан таклифлар бўлмоқда.