“Рома” етакчиси келажаги бўйича бир қарорга келди

“Рома”нинг универсал ҳужумчиси Николо Дзаньоло фаолиятини пойтахт клубида давом эттирадиган бўлди.

Дзаньолога ёзда “Ювентус” оғиз солди ва ўйинчи вакиллари билан музокарага киришган эди. Шунингдек, 22 ёшли футболчи Англиянинг етакчи клубларидан ҳам таклиф олди. Бир муддат Римдан кетишга ҳам ҳаракат қилди.

Calciomercato ва Football Italia нашрларининг хабар беришича, “Рома” спорт директори Тьягу Пинто узоқ давом этган музокаралардан сўнг италиялик футболчини жамоада қолишга кўндирган.

Николонинг амалдаги шартномаси 2024 йилнинг ёзигача тузилган. Энди римликлар уни 2027 йилнинг 30 июнигача узайтирмоқчи.