"Roland Garros". Жоковичга муаммо туғдирадиган рақиб топилди!

"Катта дубулға" туркумига кирувчи навбатдаги мусобақа ҳисобланадиган "Roland Garros" турнирида ярим финал босқичининг барча иштирокчилари маълум бўлди.

"Roland Garros-2020"нинг 1-тартиб рақам остида сараланган ракетка устаси Новак Жокович ўз фаолияти давомида 10-бор ярим финалга чиқди. Испаниялик Пабло Карреньо Бустага қарши кортга чиққан Жокович сенсацион тарзда 1-сетни бой берди. Сабаби, ортда қолган 4 ўйин ва 72 сет давомида бирорта теннисчи Новакдан сет ютиб олишни уддалай олмаган эди. Аммо рақибининг бу ишини худди ҳақоратдек қабул қилган жаҳоннинг биринчи рақамли ракетка устаси кейинги сетларда Карреньо Бустага имконият қолдирмади ва ярим финал чипталарини нақд қилди. Якуний ҳисоб: 4:6, 6:2, 6:3, 6:4.

Шунингдек, бугун Жоковичнинг финал остонасидаги рақиби ҳам аниқланди. Россиялик Андрей Рублёв ҳамда грециялик Стефанос Циципас курашида юнон ракетка устасининг қўли баланд келди. Турнирнинг 5-тартиб рақам остида сараланган теннисчиси 3 сет давом этган беллашувни 7:5, 6:2, 6:3 ҳисобида ўз номига ёздириб қўйди ва кучли тўртлик масаласини ҳал қилди.