"Роки Марчианони кўчадан топиб олгандик, олдин профессионал футбол ўйнамаган". "Хоразм" унинг трансферидан мўмайгина даромад олади ёхуд бош директор ҳаммасини айтди

“Хоразм” клуби ўтган йили камерунлик ҳужумчи Роки Марчиано трансферини эълон қилганида уни кўпчилик салоҳиятини яхши билмасди. Аммо 2002 йилда туғилган ҳужумчи кашфиётлардан бирига айланди. Қолаверса, легионер сифатида ҳам ўзини кўрсата олди. Марчиано 21 та ўйинда 15 та гол урди.

Бу легионерга бошқа клублар қизиқиб қолганини эшитаётгандик. Бироқ “Хоразм” легионерининг БААнинг “Ажман” клубига йўл олишини кўпчилик кутмаган бўлса керак. Шундан келиб чиққан ҳолда “Хоразм” бош директори Мақсуд Каримов билан боғланиб ушбу ҳужумчининг трансфер тафсилотларини билишга ҳаракат қилдик.

“Ҳали 100 фоиз ҳал бўлмаган”

“БААда 10 январда трансфер ойнаси очилади. Шундан кейин ҳаммаси расман аниқ бўлади, - дея гап бошлади, Каримов. - Ҳали улар бизга келишилган суммани тўлаб бергани йўқ. Тез орада барчаси ойдинлашади. 100 фоиз ҳал бўлмаган. “Хоразм” бу футболчини “Ажман” клубига трансфер қилган.

“Футболчининг шартномасида келтирилган трансфер суммаси бор”

- БАА клуби бизга расман таклиф билан чиққан. ФИФА қоидаси бўйича олти ойдан кўпроқ муддатдаги шартномаси бор футболчига клуб расмийлари таклиф билан чиқишлари мумкин. Шунга асосан “Ажман” клубидан “Хоразм” жамоасига таклиф билан чиқишди. Биз музокара олиб боришга рухсат бердик. Футболчини шартномасида келтирилган трансфер суммаси бор эди. Амирликлар шуни тўлайдиган бўлди, футболчининг агенти ҳам рози бўлди. Марчианони клубимиз билан яна бир йиллик шартномаси бор эди. Юқорида айтганимдек, 10 январда трансфер ойнаси очилади ва барча хужжатлар расмийлаштирилгач, улар бизга пулни икки кун ичида ўтказиб бериши керак. Шундан кейин биз расман бу ҳақида эълон қилмоқчимиз.

“Бизнинг ишимиз клубга фойда келтириш”

- Рокини агенти бор. Ўша агенти билан гаплашиб турамиз. Қолаверса, биз хорижлик скаутлар билан ҳам иш олиб борамиз. Бу футбол бизнеси. Бизнинг ишимиз клубга фойда келтириш. Биз бу йилдан энди бошқачароқ режа қиляпмиз. Инфраструктурамизни яхшилаш ҳаракатидамиз. Ўзимиз ҳам қўл қовуштириб турмасдан маблағ ишлаб топишга ҳаракат қиляпмиз. 3-4 та футболчиларимиз Суперлига клубларида кўрикда бўлиб туришибди. Уларни ҳам трансфер қилган ҳолда молиявий аҳволимизни яхшилаш ниятимиз бор. Бу йил асосан 19-21 ёшдаги футболчиларни жамоага йиғяпмиз. 2000-2001 йилларда туғилган йигитларни оляпмиз. Ёши каттароқ футболчиларни таклиф қилмаяпмиз.

“Марчиано бунгача ҳаваскорлар жамоасида ўйнаб юрган”

- Роки Марчианони кўчадан топиб олгандик. Қишда бизга келиб қолганди. Бошида хужжатларида бироз муаммолари бўлган. Бундан ташқари, у бирорта клубда профессионал футбол ҳам ўйнамаган. Фақат ҳаваскорлар жамоасида ўйнаб юрган. Роки танишларим орқали бизга кўрикка келганди. Мураббий билан биргаликда уни 10 кунча кузатдик. Қарасак, унда нимадир бор. Хужжатлари роса чалкаш эди. Қонуний жарималарини тўладим ва барча ҳужжатларини тўғрилаб олдик. Эътибор қилган бўлсангиз, бошида у бир-икки ой ўйнамади. Агар бошидан ўйнаганида балки тўпурар бўлиши мумкин эди. Марчиано қийналган бола эди, уни мақсади ўсиш эди. Пулни ўйламаган. Ўзбекистонда ўйнаб бошқа жойга кетишни ният қилганди. Футболчи ўзи учун мотивация қила олди. Майдонга чиққанида фақат борини бериб ўйнади. Шундан кейин унинг даражаси ўйиндан-ўйинга яхшиланиб бораверди. Роки ҳар сафар охирги ўйинга чиққандек чиқарди. Бундан ташқари, одамгарчилиги ҳам ажойиб эди. У кетди, бу билан ҳаёт тўхтаб қолмайди. Биз яна иқтидорларни излаймиз. Ўзимиздан ҳам иқтидорларни қидирамиз”, - дея жавоб берди, Мақсуд Каримов.

Кўриб турганингиздек, “Хоразм” футбол клуби ўзини-ўзи маблағ билан таъминлаш йўлида тинимсиз ҳаракатда. Бунинг учун Роки Марчианони БАА клубига трансфер қила олгани ва бундан мўмайгина даромад топиши ҳам мақтовга сазовор.

Про лига клубининг бундай оқилона иш юритишини Суперлига клубларига ҳам ўрнак қилиб кўрсатса арзийди.

Тан олиш керак, бошида биров Марчианони у қадар менсимаганди ҳам. Бироқ “Хоразм” легионер танлашда адашмаган экан. Мана, энди камерунлик футболчиси орқали даромадга эга бўлиш арафасида турибди.

Шуҳратбек Жўраев.