“Реал”ни вақтинчалик ким бошқариши маълум бўлди

“Реал” раҳбарияти жамоанинг Европа Чемпионлар лигасидаги муваффақиятсизлиги ва Ла Лигада пешқадамликни “Барселона”га топшириб қўйгани учун Карло Анчелоттини бош мураббийликдан озод қилиши эҳтимоли ошиб бормоқда.

Италиялик мутахассиснинг ўзи ишини давом эттиришини ва мавсум якунланганидан кейин раҳбарият билан музокара ўтказишини таъкидлаган.

Шунга қарамай, “Қироллик клуби” 65 ёшли мутахассис истеъфога чиқарилган тақдирда янги бош мураббий келганича жамоани ким бошқаришини ҳал қилиб олди.

Sport.es нашрига кўра, бош мураббий истеъфоси юз берган тақдирда футболчиларга клуб директорларидан ҳисобланган Сантьяго Солари устозлик қилиб туради.

Бу мутахассис 2018 йилнинг кузида ўша даврдаги бош мураббий Хулен Лопетеги ишдан олинганидан кейин ҳам “Реал” футболчиларини вақтинча бошқарган эди.