"Реал"га гол урган Яхшибоевдан хушхабар!
- 27-октябр 2021, 19:12
- Zohir Toshxo’jayev
- 2
- Футбол
“Шериф” шарафини ҳимоя қилаётган Жасур Яхшибоев Европа Чемпионлар лигаси гуруҳ босқичининг иккинчи турида “Реал”га қарши учрашувда гол урганидан кейин жароҳат олиб, беллашувни охиригача етказа олмаган эди.
Кейинчалик легионеримизнинг жароҳати бироз жиддий бўлиб чиқди ва у Ўзбекистон миллий терма жамоасининг Иорданияда ташкил этилган ўқув-машғулот йиғинида ҳам иштирок этолмади.
Бундан ташқари, Яхшибоев Чемпионлар лигасининг учинчи турида “Интер”га қарши ўтказилган баҳс ва Молдова чемпионатининг ўйинларида ҳам жамоасига ёрдам бера олмади.
Ниҳоят, ҳамюртимиз жароҳатидан буткул қутилиб майдонга қайтди. Молдова кубогининг нимчорак финал босқичида “Шериф” футболчилари “Саксан” жамоаси билан куч синашди. Иккинчи бўлимнинг ўрталарида захирадан ўйинга қўшилган Жасур Яхшибоев ярим соат давомида жуда фаол ўйнади.
Легионеримиз 75-дақиқада гол уриш имконига эга бўлганди. Бироқ, унинг яқин масофадан берган зарбасини рақиб дарвозабони қайтаришни уддалади. Яна бир вазиятда унинг зарбасидан сўнг, тўп дарвоза тўсинига тегиб қайтди.
Учрашув 6:0 ҳисобида “Шериф” фойдасига ҳал бўлди.
Кўпчилик ўзбекистонлик мухлислар “Шериф”нинг Европа Чемпионлар лигасидаги навбатдаги учрашувини катта қизиқиш билан кутмоқда. Тирасполь клуби “кўҳна қитъа”нинг энг нуфузли турниридаги баҳсни 11 ноябрь куни ўтказади. Гуруҳдаги тўртинчи турда “Шериф” ўз майдонида Италия чемпиони “Интер”ни қабул қилади.
Бўлажак баҳсда Жасур Яхшибоев яна бошланғич таркибда майдонга тушиши кутиляпти. Бунинг учун ўзбекистонлик футболчи жисмоний тайёргарлигини кучайтириб, спорт формасини янада тиклаб олиши талаб этилади.
Эслатиб ўтамиз, Жасур Яхшибоев “Пахтакор” футбол академияси тарбияланувчиси ҳисобланади. Истеъдодли ҳужумкор футболчи 20016-2020 йиллар давомида “шерлар” сафида жами 46 марта майдонга тушиб, рақиблар дарвозасини уч маротаба ишғол қилган.
Кейинчалик, “Пахтакор” раҳбарияти Жасурни АГМК жамоасига ўтказди. Бу жамоада бир мавсум ўйнаган футболчи, ўз омадини хорижда синаб кўриш учун Беларусь чемпионатига йўл олганидан яхши хабардорсиз.
Беларусь олий лигасидаги иштирокини “Энергетик-БГУ”да бошлаган Жасур Яхшибоев иккинчи давра олдидан чемпионлик учун курашаётган “Шахтёр-Солигорск” жамоасидан таклиф олди. Чемпионатнинг иккинчи ярмини “кончилар” жамоасида ўтказган ҳамюртимиз, Беларусь чемпиони бўлди.
2021 йилнинг бошида Яхшибоев Польшанинг “Легия” жамоаси билан уч йиллик шартнома имзолади. Бу жамоа 2020-2021 йилги мавсумда чемпионликка сазовор бўлди. “Легия” сафида битта ўйинда бир неча дақиқа ўйнаган Жасур Яхшибоев ҳам Польша чемпиони ҳисобланади.
“Легия”да етарли ўйин амалиётига эга бўлмаётган ўзбек футболчиси ёзги трансферлар вақтида ижара асосида “Шериф” жамоасига ўтди. Унинг тирасполликлар билан шартномаси 2022 йилнинг ёзигача давом этади.