“Реал” ва “Барса” ҳали танилмаган ўйинчи учун курашяпти

Нидерландия чемпионатида “АЗ Алкмаар” жамоаси шарафини ҳимоя қилаётган ярим ҳимоячиси Кес Смит Европа грандларининг эътиборини шўзига қаратишда давом этмоқда. 
Мадриднинг “Реал” клуби 19 ёшли футболчига асосий даъвогарлардан бири ҳисобланади, шу билан бирга “Барселона” ҳам бу ўйинчи ашаддий рақиб сафида эмас, балки Каталония клубида тўп тепишини истаяпти. 

Испания клублари орасида “Атлетико” Кес Смит учун кураш олиб бораётгани ҳам маълум бўлди. Энди номи чиқаётган иқтидорли ўйинчи бир неча ойдан бери Англия Премьер-лигаси вакиллари “Манчестер Сити” ва “Челси” скаутлари томонидан кузатувга олинган. 

Таниқли инсайдер Маттео Моретто Х ижтимоий тармоқдаги саҳифасида турли клублар скаутлари Смитнинг ўйинини бевосита томоша қилиш учун унинг иштирокидаги ўйинларга келаётганини маълум қилди. 

Transfermarkt маълумотларига кўра, Кес Смитнинг бозор қиймати айни пайтда 22 миллион еврони ташкил этади. Футболчининг “АЗ Алкмаар” билан шартномаси 2028 йилнинг ўрталаригача амал қилади. 

Жорий мавсумда нидерландиялик футболчи 26 та ўйин ўтказиб, иккита гол ва бешта голли узатма муаллифи бўлди.