“Реал” катта пул тўлашдан озод бўлди

“Реал” раҳбарияти янги бош мураббий бўлиши кутилаётган Хаби Алонсо учун испаниялик мутахассиснинг ҳозирги иш жойи – “Байер” клубига бадал пули тўламайдиган бўлди.

Футболда қабул қилинган қоидаларга кўра, шартнома муддати тугамасидан бошқа клубдан ўйинчи ёки мураббий олиш, муайян миқдорда бадал пули тўлаш орқали амалга оширилади.

Хаби Алонсонинг “Байер” билан ҳамкорлик шартномаси яна бир йил давом этиши керак эди. The Telegraph нашрининг ёзишича, Леверкузен клуби раҳбарияти жамоани тарихда илк бор чемпионга айлантирган бош мураббийни бадал пулисиз қўйиб юборадиган бўлди.

“Байер” клуби 9 май кун  жамоани 2022 йилнинг ёзидан бери бошқариб келаётган Хаби Алонсо жорий мавсум тугаши билан клубни тарк этиши ҳақида расмий ахборот чиқарган эди.